Fana: At a Speed of Life!

ሀገር አቀፍ የፖለቲካ ፓርቲዎች ድርድራቸውን በነገው ዕለት ይቀጥላሉ

አዲስ አበባ፣ ግንቦት 21፣ 2010 (ኤፍ.ቢ.ሲ) ሀገር አቀፍ የፖለቲካ ፓርቲዎች ማካሄድ የጀመሩትን ድርድር በነገው አለት ይቀጥላሉ።

ኢህአዴግ ጨምሮ 14 ተፎካካሪ የፖለቲካ ፓርቲዎች 12 የድርድር ነጥቦችን ላይ ሲደራደሩ የቆዩ ሲሆን፥ በተለያዩ አጀንዳዎች ላይም ከስምምነት ላይ መድረሳቸው ይታወሳል።

የሀገሪቱ የምርጫ ህግ፣ የምርጫ ቦርድ አደረጃጀት እና የምርጫ ስርዓቱ ላይ ባደረጉት ድርድር ማሻሻያ በማድረግ እና ባሉበት እንዲቀጥሉ በመስማማት የመጡባቸው አጀንዳዎችም ናቸው።

ተደራዳሪ ፓርቲዎቹ በሞራል ካሳ ፈንድ፣ በሽብርተኝነት ትርጓሜና በሌሎች የፀረ-ሽብር አዋጅ አንቀጾች ላይ ማስተካከያ ለማድረግ መግባባት ላይ መድረሳቸውም ይታወሳል።

ፓርቲዎቹ በፀረ ሽብር ህጉ ላይ ከመግባባት ላይ የደረሱባቸው ጉዳዮችም በባለሙያዎች ተደራጅተው እንዲቀርቡ ውሳኔ ማሳለፋቸው ይታወቃል።

ነገ በሚኖራቸው ስብሰባም በህግ ባለሙያዎች ተደራጅቶ በሚመጣው ሰነድ ላይ ተወያይተው ውሳኔ እንዲሚሰጡም ይጠበቃል።

በበላይ ተስፋዬ

You might also like
Comments
Loading...