Fana: At a Speed of Life!

ከጀሞ ሚካኤል አየር ጤና የሚወስደው መንገድ በቆሻሻ መዘጋቱ የትራፊክ አደጋ ተጋላጭነትን ጨምሯል

አዲስ አበባ፣ ጥር 15፣ 2010 (ኤፍ.ቢ.ሲ) ከጀሞ ሚካኤል አየር ጤና የሚወስደው የቀለበት መንገድ በከፊል በቆሻሻ በመዘጋቱ የትራፊክ አደጋ ተጋላጭነት እንዲጨምር ምክንያት መሆኑን አሽከርካሪዎች እና ነዋሪዎች ተናገሩ።

ቀለበት መንገዱ በሰዓት 50 እና 80 ኪሎ ሜትር ማሽከርከር እንዲቻልበት ተደርጎ በሁለት አቅጣጫ የተገነባ ነው።

ይሁን እንጂ ወደ አየር ጤና የሚያስኬደውና በዳር በኩል ያለው የአስፓልት መንገድ፥ በተለምዶ ቆሼ ተብሎ በሚጠራው በኩል በመሆኑ ለከፍተኛ የቆሻሻ መጣያነት ተጋልጧል።

በዚህም ምክንያት መንገዱ በቆሻሻ ክምር ተዘግቷል ሲሉ ቅሬታ አቅራቢዎቹ ለፋና ብሮድካስቲንግ ኮርፖሬት ይናገራሉ።

ቆሻሻው መንገዱን በመዝጋቱ ምክንያትም የትራንስፖርት አገልግሎት የሚሰጡ ታክሲዎች፥ ለማውረድም ሆነ ለመጫን 80 ኪሎ ሜትር በሰዓት የሚነዳበትን የፍጥነት መንገድ ለመጠቀም ተገደዋል ነው የሚሉት፤ ሁኔታው የትራፊክ አደጋ ተጋላጭነት መጨመሩን በመጥቀስ።

የምዕራብ አዲስ አበባ መንገዶች ሀብት አስተዳደር ሪጅን በበኩሉ፥ ለችግሩ እልባት ለመስጠት እንቅስቃሴ ማድረጉን ገልጿል።

የሪጅኑ ዳይሬክተር ኢንጂነር መሀመድ አወል ሰይድ፥ መንገዱን ለብልሽት ያጋለጠውን የቆሻሻ አመላላሽ ተሽከርካሪዎች ጉዳይን መፍትሄ ለመስጠት ለአዲስ አበባ ፅዳት አስተዳደር ኤጀንሲ ደብዳቤ ተፅፎ ምላሸ እንደሌለ ተናግረዋል።

የደብዳቤው ቅጅ ከጀሞ ሚካኤል ወደ አየር ጤና በሚወስደው መንገድ ላይ እየተካሄደ ባለው ቆሻሻን የማመላለስ ስራ ምክንያት መንገዱ ለቆሻሻ ክምር መጋለጡንና ኤጀንሲውም ይህን እንዲያስተካክል ይጠይቃል።

ይሁን እንጂ የአዲስ አበባ ፅዳት አስተዳደር ኤጀንሲ ከአዲስ አበባ መንገዶች ባለስልጣን የተጻፈልን ደብዳቤ የለም ብሏል።

የኤጀንሲው ምክትል ስራ አስኪያጀ አቶ ማስረሻ አስናቀው፥ ለደረቅ ቆሻሻ መልሶ መጠቀምና ማስወገድ ፕሮጀክት የተጠየቅነው የቆሻሻ ገንዳ እንድናነሳ ብቻ ነው ይላሉ።

ለመንገዱ መበላሸት እና ተሽከርካሪ ምልልስ ማቆም ዋናው ምክንያት ባለፈው አመት ባለስልጣኑ እጠግናለሁ በሚል በማፈራረሱ ነው ይላሉ ምክትል ስራ አስኪያጁ።

እርሳቸው ይህን ቢሉም የአዲስ አበባ መንገዶች ባለስልጣን ለኤጀንሲው የጻፈውን የደብዳቤ ቅጅ ጣቢያችን መመልከት ችሏል።

ኢንጂነር መሀመድ አወል በበኩላቸው፥ ደረቅ ቆሻሻ ለሚያመላልሱ ተሽከርካሪዎች መግቢያ እና መውጫን በሰዓት 80 ኪሎ ሜትር ከሚነዳበት የፍጥነት መንገድ ጋር

ከባለስልጣኑ ፍቃድ ውጭ በኮንክሪት መገንባቱ የመንገዱን ህልውና ጎድቶታል ባይ ናቸው።

ለችግሩ ዘላቂ መፍትሄ ለመስጠትም ከከተማው የመንገዶች ባለስልጣን ጋር ተቀራርበን እንሰራለን ብለዋል።

በህግ የሚታየው ጉዳይ እንዳለ ሆኖ በቅርቡ ቆሻሻውን በማንሳት ለትራፊክ ክፍት ለማድረግ የጥገና እቅድ መያዙንም አስረድተዋል።

በሰርካለም ጌታቸው

You might also like
Comments
Loading...