Fana: At a Speed of Life!

የብአዴን ስብሰባ: የብአዴን ማእከላዊ ኮሚቴ መደበኛ ስብሰባውን እያካሄደ ነው

አዲስ አበባ፣ ጥር 16፣ 2010 (ኤፍ.ቢ.ሲ) የብሄረ አማራ ዴሞክራሲያዊ ንቅናቄ (ብአዴን) ማእከላዊ ኮሚቴ መደበኛ ስብሰባ በባህርዳር ከተማ እየተካሄደ ነው።

የብአዴን ማእከላዊ ኮሚቴ ጽህፈት ቤት ሃላፊ አቶ አለምነው መኮንን በሰጡት ማብራሪያ፥ ማእከላዊ ኮሚቴው በዋናነት በሁለት ዋና ዋና አጀንዳዎች ላይ እየተወያየ እንደሆነ ገልጸዋል።

በተለይም በመስከረም ወር ላይ የተገመገመውን የጥልቅ ታሃድሶ የአንድ ዓመት ግምገማና ኮንፍረንሶች የመጡ ለውጦችና አሁንም በተጨባጭ ያሉ ተግዳሮቶችን እንደሚፈተሸ ገልፀዋል።

በዚሁ ግምገማም በይዘቱ የተጀመረውን የጥልቅ ተሃድሶ ንቅናቄ ማስፋትና በአግባቡ ያልሰረፀባቸው አካባቢዎች የማስረፅ ስራ ቀጣይነቱን የማረጋገጥና በሁሉም መስኮች ለውጥ የማስመዝገብ ንቅናቄን ማዕከል ያደረገ ስራ ለመስራት የሚያስችል አቅጣጫ እንደሚጠበቅም ገልፀዋል።

በተጨማሪም ከዚሁ አጀንዳ ጋር በተያያዘም በኢህአዴግ ደረጃ የተካሄደውን ግምገማና ግምገማው እንደ ብአዴን በምን መልኩ ይገለፃል የሚለውን ወደ ውስጥ የመፈተሸ እንዲሁም ኢህአዴግ ብሄራዊ ድርጅቶቹ ማየት አለባቸው በሚል የሰጠውን አቅጣጫ መሰረት በማድረግ በዝርዝር የመፈተሸ ዓላማ ይዞ እየተካሄደ ያለ ግምገማ እንደሆነም ተናግረዋል።

ማእከላዊ ኮሚቴው በሌላ መልኩ በአጀንዳ ይዞ ከሚወያይባቸው ጉዳዮች መካከል በዚህ ዓመት በግንቦት ወር የሚካሄደውን የአካባቢ የቀበሌና የወረዳ ምክር ቤቶች ምርጫና የክልልና የህዝብ ተወካዮች ምክር ቤቶች ማሟያ ምርጫ አንዱ ነው።

ምርጫው ሰላማዊ፣ ዴሞክራሲያዊና አሜኔታን ያተረፈ ሁኖ እንዲጠናቀቅ በተለይም ህዝቡ የቅርብ አመራሮች የሚሰጡትን የቀበሌና የወረዳ አመራሮቹን የሚመርጥበት በመሆኑ የተሻሉ እጩዋችን እንዴት እናዘጋጅ የሚለውን እንደ ድርጅት በዝርዝር የመወያየትና ከተቋዋሚ ፓርቲዎችስ ጋር ምርጫውን ሰላማዊና ዲሞክራሲያዊ በማድረግ ረገድ እንዴት ተባብረን እንስራ የሚለውን አቅጣጫ የማስቀመጥ ውይይት እንደሚጠበቅ ገልፀዋል።

በባህር ዳር እየተካሄደ ባለው በግምገማ ላይ በስራ ላይ የሚገኘው የማእከላዊ ኮሚቴ አባላትና በድርጅቱ ከፍተኛ አስተዋፅኦ ሲያበረክቱ የቆዩ 22 ነባር አመራሮች በመሳተፍ ላይ መሆናቸውንም ተናግረዋል።

አቶ አለምነው አክለውም፥ በወልድያ ከተማ በተከሰተው የፀጥታ ችግር ምክንያት በደረሰው የህይወት ህልፈት የተሰማቸውን ሀዘን ገልፀው ለሟች ቤተሰቦችና ወዳጅ ዘመዶች መፅናናትን ተመኝተዋል።

የብአዴን ማእከላዊ ኮሚቴ መደበኛ ስብሰባ ጥር 13 የተጀመረ ሲሆን፥ ለተከታታይ ቀናትም የሚቀጥል መሆኑንም ከብአዴን ጽህፈት ቤት ያገኘነው መረጃ ያመለክታል።

You might also like
Comments
Loading...