Fana: At a Speed of Life!

ቻይና 400 ሺህ ዜጎችን ከድህነት የሚያወጣ እቅድ ይፋ አደረገች

አዲስ አበባ ፣ የካቲት 12 ፣ 2010 (ኤፍ ቢ ሲ) ቻይና 400 ሺህ ዜጎችን ከድህነት ማውጣት የሚያስችል እቅድ ይፋ አደረገች።እቅዱ በዢንጂያንግ ክልል የሚገኙና በዝቅተኛ የኑሮ ደረጃ ላይ ያሉ ዜጎችን ከድህነት ማውጣት የሚያስችል ነው ተብሏል።

ከዚህ ባለፈም አዲሱ እቅድ በሚተገበርበት የዢንጂያንግ ክልል የታጣቂዎችን ስጋት ለመቀነስ ያለመ መሆኑም ነው የተነገረው።

እቅዱ በሰሜን ምዕራብ የሀገሪቱ ክፍል የሚገኙ 22 የግዛት አስተዳደሮችን በሶስት አመታት ከድህነት ለማውጣት ትኩረት እንደሚያደርግ ተነግሯል።

ለሶስት አመታት ይተገበራል በተባለው የፀረ ድህነት ዘመቻ እቅድ የተመደበው የገንዘብ መጠን ግን አልተጠቀሰም።

የቻይና መንግስት ባለፈው አመት ለፀረ ድህነት ዘመቻ 960 ሚሊየን ዶላር የበጀት ሲሆን፥ በዋናነት በአራት ክልሎች የድህነት መጠኑን ከ80% ለመቀነስ ያለመ ነበር።

ለዚህም በተለያዩ ክልሎች በሚገኙ 192 ቦታዎች የድህነት ቅነሳ ፕሮግራሙ እስከ ፈረንጆቹ 2020 የሚቀጥል ይሆናል።

ይህን እቅድ ተፈጻሚ የሚያደረግ የመንግስት ባለስልጣናትም ተመድበዋል ነው የተባለው።

የጸረ ድህነት ዘመቻው በዋነኝነት የገጠሩን የህብረተሰብ ክፍል ከድህነት ለማውጣትና አሁን ላይ ያለውን የዜጎችን አመታዊ የነብስ ወከፍ ገቢ ከ362 የአሜሪካ ዶላር ለማሻሻልና ለማሳደግ ትኩረቱን አድርጓል።

ቻይና በፈረንጆቹ 2017 ወደ 13 ሚሊየን የሚጠጉ ዜጎችን ከድህነት ማላቀቋን መረጃዎች ያመላክታሉ።

የፀረ ድህነት ዘመቻው የሚተገበርበት አካባቢ ሙስሊም የኡሁሮ ማህበረሰብ አባላት መኖሪያ ሲሆን፥ በአካባቢው የኡሁሮ ማህበረሰብ ተገንጣይ ቡድን አማካኝነት ተደጋጋሚ ጥቃቶች እንደሚፈጸሙም ይነገራል።

የሚፈጠረውን ረብሻ መነሻ በማድረግም ቻይና በክልሉ ከፍተኛ የደህንነት ቁጥጥር ማድረግ ጀምራለች።

በአካባቢው ለሚፈጠረው ሁከትና ብጥብጥም ቤጂንግ የኡሁሮ ማህበረሰብ ተገንጣይ ቡድንን ተጠያቂ ታደርጋለች።

ዢንጂያንግ 10 ሚሊየን ኡሁሮ ሙስሊሞች መኖሪያ ስትሆን ዜጎቹ በእምነታቸውና በባህላቸው ምክንያት ተፅዕኖ እንደሚደርስባቸው ይናገራሉ፤ የቻይና መንግስት ውንጀላውን ባይቀበልም።

የኡሁሮ ሙስሊሞች በሶሪያና ኢራቅ የሚንቀሳቀሱና እንደ አይ ኤስ ኤስ ያሉ ታጣቂ ቡድኖችን ሳይቀላቀሉ እንዳልቀረም ይነገራል።

ከአመት በፊት በኢራቅ የኡሁሮ ሙስሊሞች ከአይ ኤስ ጋር ስልጠና ሲወስዱ የሚያሳይ ምስልን ቡድኑ መልቀቁ ይታወሳል።

ይህን ተከትሎም ኡሁሮዎች መሰል ቡድኖችን እንዳይቀላቀሉ በቻይና መንግስት በኩል ከፍተኛ ስጋት አለ᎓᎓

 

 

ምንጭ፦ አልጀዚራ

You might also like
Comments
Loading...