በ253 ሚሊየን ብር ወጭ የተገነባው የመንዲ ጊዳሜ የኤሌክትሪክ መስመር አገልግሎት መስጠት ጀመረ

አዲስ አበባ፣ ግንቦት 9፣ 2010 (ኤፍ.ቢ.ሲ) ከአፍሪካ ልማት ባንክ በተገኘ ብድርና በኢትዮጵያ መንግስት ድጋፍ በ253 ሚሊየን ብር ወጪ የተገነባው የመንዲ ጊዳሜ የ150 ኪሎ ሜትር የኤሌክትሪክ ሃይል ማስተላለፊያና ማሰራጫ ጣቢያ ፕሮጀክት ተጠናቆ አገልግሎት መስጠት ጀመረ።

አዲሱ የሃይል ማስተላለፊያ መስመር ካለፈው መጋቢት 23 ቀን 2010 ዓም ጀምሮ ለአካባቢው ነዋሪዎች አገልግሎት መስጠት ጀምሯል።

ይህ ባለ 132 ኪሎ ቮልት አዲስ የማስተላለፊያ መስመር ግንባታ የጊዳሜ ከተማን ጨምሮ ሌሎች የአካባቢው የገጠር ቀበሌዎችን ተጠቃሚ የሚያደርግ ነው ተብሏል።

የመንዲ ጊዳሜ የኤሌክትሪክ ሃይል ማስተላለፊያ ፕሮጀክት መሃንዲስ አቶ ሁሉንአየሁ ደጀኔ እንደተናገሩት፥ ፕሮጀክቱ በ2003 ዓ.ም ተጀምሮ በ2010 ዓ.ም ተጠናቆ ገልግሎት መስጠት መጀመሩን ተናግረዋል።

ፕሮጀክቱ ለአካባቢው ማህበረሰብ የሚሰጠው ጠቀሜታና የሚፈጥረው መነቃቀት ከፍተኛ መሆኑን ነው ኃላፊው የገለጹት።

ግንባታው ከአፍሪካ ልማት ባንክ በተገኘ ብድርና በኢትዮጵያ መንግስት ወጪ የተከናወነ መሆኑን ገልጸዋል።

የመንዲ ጊዳሜ ኤሌክትሪክ ሃይል ማስተላለፊያ ፕሮጀክት ግንባታ ስራ አስኪያጅ አቶ ሰለሞን ልዑል በበኩላቸው ፕሮጀክቱ የጊዳሜ ከተማና አካባቢዋን ነዋሪዎች ተጠቃሚ ያደርጋል።

በተጨማሪም በአካባቢው የሚገኙ የገጠር ቀበሌዎችም ተጠቃሚ ይሆናሉ።

በተጨማሪም መንዲ ከተማ ላይ ባለ 132 ኪሎ ቮልት የማስፋፊያ ስራ በመስራት በአካባቢው የሚገኙ የገጠር ቀበሌዎችን ተጠቃሚ ለማድረግ እየተሰራ መሆኑንም ተናግረዋል።

ምንጭ፦ ኢዜአ