የኢትዮ- ሳዑዲ የጋራ የሚኒስትሮች ኮሚሽን ስብሰባ በአዲስ አበባ ተጀመረ

አዲስ አበባ፣ ሚያዚያ 8፣ 2010 (ኤፍ ቢ ሲ) 5ኛው የኢትዮ- ሳዑዲ ዓረቢያ የጋራ የሚኒስትሮች ኮሚሽን ስብሰባ ዛሬ በአዲስ አበባ ተጀመረ።

በስብሰባው ላይ የእርሻና ተፈጥሮ ሃብት ሚኒስትር ዲኤታ ዶክተር ካባ ኡርጌሳ፥ ኢትዮጵያ የሳዑዲ ባለሃብቶችን ለመሳብ እየሰራች መሆኗን ተናግረዋል።

ሳዑዲ ዓረቢያ አብዛኛውን የግብርና ምርቶቿን ከደቡብ አሜሪካ ሃገራት እንደምታስገባ የጠቀሱት ሚኒስትር ዲኤታው፥ ሃገራቱ ካላቸው አቀማመጥ አንጻር ጠንክሮ መስራት ከተቻለ ኢትዮጵያ የግብርና ምርቶቿን ለሳዑዲ ዓረቢያ ማቅረብ ትችላለች ነው ያሉት።

አሁን ላይም ሃገራቱ ያላቸውን ግንኙነት በማጠናከር ኢትዮጵያ የግብርና ምርቶቿን ለሳዑዲ ለማቅረብ እየሰራች መሆኑንም አስረድተዋል።

የሳዑዲ ዓረቢያው የእንስሳት፣ አካባቢ፣ ውሃና ግብርና ምክትል ሚኒስትር ዶክተር ሃማድ ቢን አብዱልአዚዝ በበኩላቸው ኢትዮጵያ በርካታ የተፈጥሮ ሃብት ያላት ሃገር መሆኗን ገልጸዋል።

ሳዑዲ የግሉን ዘርፍ በማስተባበር የሃገራቱን ህዝቦች የጋራ ተጠቃሚነት ለማሳደግ ትሰራለችም ብለዋል።

የሃገራቱ የንግድ ልውውጥ በፈረንጆቹ 2014 1 ነጥብ 4 ቢሊየን ዶላር የነበረ ሲሆን፥ ይህ አሃዝ ባላፈው አመት ወደ 600 ሚሊየን ዶላር ዝቅ ማለቱ ተጠቅሷል።

ለዚህ ደግሞ በሃገራቱ መካከል የተደረሰው ስምምነት በአግባቡ አለመተግበርና ቁርጠኝነት ለሃገራቱ የንግድ ልውውጥ ማነስ ምክንያት ነው ተብሏል።

በጋራ የሚኒስትሮች ኮሚሽን ስብሰባ የተለያዩ የሁለትዮሽ ጉዳዮች ተነስተው ውይይት ይደረግባቸዋል ተብሎ ይጠበቃል።

ከዚህ ባለፈም ወንጀለኛን አሳልፎ መስጠት፣ የተደረሱ የኢንቨስትመንት ስምምነት አፈጻጸምን መከታተል የሚያስችል እና የሰራተኛ የስራ ስምሪት ትግበራን የተመለከቱ ውይይቶች ተደርገው ስምምነቶችን ይደረሳሉ ተብሎም ነው የሚጠበቀው።

ከዚህ ባለፈም በግብርናው ዘርፍ የልምድ ልውውጥ ማድረግ የሚያስችል የመግባቢያ ስምምነት እና አክራሪና ፅንፈኝነት በጋራ መዋጋት የሚያስችል ስምምነት ይፈረማል ተብሎም ይጠበቃል።

ሁለቱ ሀገራት ባለፈው ሳምንት በኢትዮጵያውያን ሰራተኞች የቅጥር ሁኔታ ላይ መስማማታቸው የሚታወስ ነው።

ሃገራቱ የቆየ ታሪካዊ ግንኙነት ያላቸው ሲሆን፥ አሁን ላይ በጥምረት የሚተገበሩ 237 ፕሮጀክቶች በኢትዮጵያ ይገኛሉ፤ ከዚህ ውስጥ 113ቱ ወደ ስራ መግባታቸው ይነገራል።

በስላባት ማናዬ