በዓለም ቅርስነት የተመዘገቡ አራት ቋሚ ቅርሶች ሊታደሱ ነው

አዲስ አበባ፣ ጥቅምት 3፣ 2010(ኤፍ.ቢ.ሲ) በዓለም ቅርስነት የተመዘገቡ አራት ቋሚ ቅርሶች ላይ ዕድሳት ሊያደርግ መሆኑን የቅርስ ጥናት እና ጥበቃ ባለስልጣን አስታወቀ፡፡

የላሊበላ ውቅር አብያተ ክርስቲያናት፣ የአክሱም ሐውልት፣ የጎንደር ፋሲለደስ ግንብ እና የጢያ ትክል ድንጋዮች በተያዘው በጀት ዓመት እድሳት የሚካሄድባቸው የሚዳሰሱ ቅርሶች ናቸው።

ለቅርሶቹ ጥገና መንግስት ከበጀተው 34 ሚሊዮን ብር በተጨማሪ ከአውሮፓ ህብረት 400 ሺህ ዶላር፣ ከአሜሪካ እና ከሌሎች የፋይናንስ ተቋማት ድጋፍ መገኘቱን ባለስልጣኑ አስታውቋል።

በባለስልጣኑ የቅርስ ጥበቃ እና እንክብካቤ ዳይሬክተር አቶ ኃይሉ ዘለቀ፥ ቅርሶቹ በእርጅና እና በወቅቶች መለዋወጥ ለተለያዩ ችግሮች ተጋላጭ ሆነው በመቆየታቸው የመሰነጣጠቅ፣ ዝናብ የማስገባት ችግሮች እየተከሰተባቸው በመሆኑ ጥገና ማድረግ አስፈልጓል ብለዋል፡፡

የላሊበላ ውቅር አብያተ ክርስቲያናት እና የአክሱም ሀውልት የጥገና እና የጥናት ስራዎች በተያዘው በጀት ዓመት እንደሚካሔድ ነው የሚናገሩት፡፡

የጎንደር ፋሲለደስ አንዳንድ ቤተ መቅደሶች ላይ ቀደም ሲል የተከሰተውን የመፈራረስ ችግር በዘላቂነት ለመጠገን የአማካሪ ተቋም መረጣ ተካሂዶ በተያዘው ዓመት ወደ ጥገና ስራ እንደሚገባም ነው ያብራሩት፡፡

በጢያ ትክል ድንጋይ ላይ የተከሰተውን የመሰነጣጠቅ እና መንጋደድ ችግር ከመሬቱ አቀማመጥ እና ከአፈሩ ዓይነት የተከሰተ እንደሆነ በጥናት መረጋገጡን ተግሯል።

በዚህም ቅርሱን ለማደስ ተጨማሪ የአርክቴክቸር እና የአፈር ምርመራ ጥናቶች በሁለት ወራት ውስጥ ተካሂዶ ወደ ጥገና ይገባልም ተብሏል፡፡

በአዲስ አበባ ዩኒቨርስቲ የመካነ ቅርስ ጥናት መምህር ዶክተር ካሳዬ በጋሻው እንዳሉት፥ በኢትዮጵያ የጎብኚዎችን ቀልብ እየሳቡ ያሉ ቅርሶች ዘመናትን ያስቆጠሩ በመሆናቸው ጥገና ሲታሰብ ስለ ቅርሶቹ በቂ ዕውቀት ያለው ሰው ገበያው ላይ መኖሩን በቅድሚያ ማሰብ ያስፈልጋል።

የቅርሶች ጥገና እና የአስተዳደር ስርዓቱን በባለሙያዎች ከማስመራት በተጨማሪ ባለሃብቱን እና ሕብረተሰቡን በሚያሳትፍ መልኩ ማካሄድ እንደሚገባም ተናግረዋል።

ዶክተር ካሳዬ በዘርፉ ቀጥተኛ እውቀቱ ያለው የሰው ሃይል ማፍራት ትኩረት ሊሰጠው እንደሚገባም ነው የሚያመለክቱት፡፡

የቅርስ ጥናትና ጥበቃ ባለስልጣን በተያዘው በጀት ዓመት ከመንግስት 34 ሚሊዮን ብር በተጨማሪ ከክልሎችና ከአጋር አካላት በማሰባሰብ የጥገና፣ የቅደመ ጥገና ጥናት፣ የወሰን መከለል እና የግንዛቤ ማስጨበጥ ስራ የትኩረት ማዕከሉ መሆናቸውን ተገልጿል፡፡

ምንጭ፦ ኢዜአ