በላይቤሪያ ፕሬዚዳንታዊ ምርጫ የቀድሞ እግር ኳስ ተጫዋች ጆርጅ ዊሃ እየመሩ ነው ተባለ

አዲስ አበባ፣ ጥቅምት 3፣ 2010 (ኤፍ.ቢ.ሲ) ባሳለፍነው ማክሰኞ በላይቤሪያ በተካሄደው ፕሬዚዳንታዊ ምርጫ እስካሁን በከፊል በታወቀ ውጤት የቀድሞው የእግር ኳስ ተጫዋች ጆርጅ ዊሃ ከወዲሁ መምራት ጀምረዋል ነው የተባለው።

ከሀገሪቱ የምርጫ ኮሚሽን ተገኘ የተባለው ውጤት እንደሚያመለክተው እስካሁን የድምጽ ቆጠራ ከተካሄባቸው 15 የምርጫ ጣቢያዎች ውስጥ በ11 ጆርጅ ዊሃ እየመሩ መሆኑን ነው።

የጆርጅ ዊሃ ዋነኛ ተቀናቃኝ የሆኑት የቀድሞ ምክትል ፕሬዚዳንት ጆሴፍ ቦካሂ በአንድ የምርጫ ጣቢያ መምራት የቻሉ ሲሆን፥ በአብዛኛው የምርጫ ጣቢያ ግን ሁለተኛ ደረጃን ይዘዋል ነው የተባለው።

በምርጫው ላይ የተካፈሉት እጩ ተወዳዳሪዎች ፕሬዚዳንት ሆኖ ለመመረጥ ከአጠቃላይ 50 በመቶ ድምጽ ማግኘት ይጠበቅባቸዋል።

ከእጩዎቹ አንዳቸውም እንኳ ይህንን ውጤት ማስመዝገብ ካቃታቸው ሁለተኛ ዙር ፕሬዚዳንታዊ ምርጫ የፊታችን ህዳር ይካሄዳል።

በአሁኑ ጊዜ በሀገሪቱ እየተካሄደ ያለው ምርጫ የኖቤል የሰላም ተሸላሚ እና የመጀመሪያዋ የአፍሪካ ሴት ፕሬዚዳንት በመሆን ተመርጠው ላይቤሪያን ለ12 ዓመታት የመሩትን ፕሬዚዳንት ኤለን ጆንሰን ሰርሊፍን ለመተካት ነው።

በምርጫ ውጤቱ ጆርጅ ዊሃ እንዳሸነፉ ተደርጎ የተወራውን የተሳሳተ መረጃ የሰሙት የአርሴናል የእግር ኳስ ክለብ አሰልጣኝ አርሰን ዌንገርም ለቀድሞ ተጫዋቻቸው የእንኳን ደስ አለህ መልእክት አስተላልፈዋል።

አርሰን ዌንገር በመልእክታቸውም “የቀድሞ ተጫዋቼ የነበረውን እና በአሁኑ ጊዜ የላይቤሪያ ፕሬዚዳንት ሆኖ የተመረጠውን ጆርጅ ዊሃን እንኳን ደስ አለህ ማለት እፈልጋለው” ብለዋል።

aresen_wenger.jpg

የላይቤሪያ የምርጫ ኮሚሽን ሃላፊ ጄሮሚ ኮርኮያ፥ ጆርጅ ዊሃ አሸንፈዋል እየተባለ የሚናፈሰው ወሬ ውሸት መሆኑን በመግለጽ፤ ኮሚሽኑ ውጤቱን በአስቸኳይ ለማቅረብ እየሰራ መሆኑን ገልፀዋል።

ኮሚሽኑ እስካሁን የምርጫውን አሸናፊ ይፋ አለማድረጉንም አስታውቀዋል።

ዓለም አቀፍ የምርጫ ታዛቢዎችም ባሳለፍነው ማክሰኞ በላይቤሪያ በተካሄደው ምርጫ ይህ ነው የሚባል የጎላ ችግር አልተመለከትንም፤ ምርጫው ስኬታማ ነበር ብለዋል።

ሆኖም ግን ከ20 እጩዎች ውስጥ ሶስት እጩዎችን ያቀረቡ የፖለቲካ ፓርቲዎች ህገ ወጥ ተግባር ሲፈፅሙ መስተዋላቸውንም ታዛቢዎቹ ገልፀዋል።

በሁለት ዙር ሀገራቸውን ለ12 ዓመታት የመሩት ፕሬዚዳንት ኤለን ጆንሰን ሰርሊፍን፥ ምርጫው ስኬታማ ነበር ሲሉ አድንቀዋል።

ምንጭ፦ ቢቢሲ