በጣና ሃይቅ የእምቦጭ አረምን ለማስወገድ ከኦሮሚያ ክልል የተውጣጡ በጎ ፈቃደኞች ወደስፍራው እያመሩ ነው

አዲስ አበባ፣ ጥቅምት 2፣ 2010 (ኤፍ ቢ ሲ) በጣና ሃይቅ የተንሰራፋውን የእምቦጭ አረም የማስወገድ ዘመቻን ለማገዝ ከኦሮሚያ ክልል የተለያዩ አካባቢዎች የተውጣጡ 200 በጎ ፈቃደኛ ወጣቶች ወደ ባህርዳር እያመሩ መሆኑን የሁለቱም ክልል የኮሙዩኒኬሽን ጉዳዮች ቢሮ ገልፀዋል።

የኦሮሚያ ክልል ኮሙዩኒኬሽን ጉዳዮች ቢሮ ሃላፊ አቶ አዲሱ አረጋ እንዳሉት፥ ጣናን ለመታደግ በሚደረገው ዘመቻ ለመሳተፍ ከ200 በላይ በጎ ፈቃደኛ ወጣቶች “ጣና የእኛ ነው” በሚል ወደ አማራ ክልል ማምራታቸውን ገልፀዋል።

ጣናን እንታደግ በሚለው ዘመቻ በክልል የሚገኙ የተለያዩ የህብረተሰብ ክፍሎች በመሳተፍ ላይ ናቸው።

ከዚህ ቀደም ምክትል ጠቅላይ ሚኒትስር አቶ ደመቀ መኮንን ጨምሮ ከፍተኛ የፌደራል እና የክልል የመንግስት ባለስልጣናት የእምቦጭ አረምን መስፋፋት በጣና ተገኝተው የስጋቱን ደረጃ ተመልክተዋል።

እምቦጭ አረምን የማስወገድ የ2010 ዘመቻ ባሳለፍነው ሳምንት መጀመሩ ይታወቃል።

ጣና የአንድ ክልል ሃብት ብቻ ሳይሆን የሁሉም ኢትዮጵያዊ በመሆኑ ገደብ የለሽ ርብርብ እንደሚያስፈልግ የክልሉ መንግስት ጥሪ አቅርቧል።

ይህንንም ተከትሎ የቅዱስ ጊዮርጊስ እግር ኳስ ክለብ ደጋፊዎች ከአዲስ አበባ ወደ ባህር ዳር በማምራት ለአንድ ሳምንት የቆየ ለ“ጣናን እንታደግ” ዘመቻ የሚውል የገቢ ማሰባሰቢያ ጨዋታዎችን ከባህርዳር ከተማ፣ ከፋሲል ከነማ እና ከአውስኮድ ጋር ሲያደርግ ሰንብቷል።

ደጋፊዎቹም በጣና ሀይቅ የተንሰራፋውን የእምቦጭ አረም በማስወገድ ዘመቻም ተሳትፈው ነበር።

የጎንደር እና የባህርዳር ዩኒቨርሲቲዎች አረሙን ለማጥፋት በሚደረገው ዘመቻ የሚያግዙ የተለያዩ ማሽኖችን በማዘጋጀት ላይ መሆናቸው ተነግሯል።