የኢትዮጵያ ካርታ ስራ ኤጀንሲ የ10 ከተሞችን ካርታ ሰርቶ አስረከበ

አዲስ አበባ፣ መስከረም 30፣ 2010 (ኤፍ ቢ ሲ) የኢትየዮጵያ ካርታ ስራ ኤጀንሲ በደቡብ ብሔሮች ብሔረሰቦችና ህዝቦች ክልል ለሚገኙ 10 መካከለኛ ከተሞች ካርታ ሰርቶ አስረከበ፡፡

ኤጀንሲው ካርታውን ያስረከበው ትናንት በሀዋሳ ከተማ ለክልሉ ከተማ ልማትና ቤቶች ቢሮ ነው፡፡

ርክክቡ የተካሄደው ለ10 ከተሞች የቅየሳ፣ የጥራት ቁጥጥር፣ የመስመርና ሌሎች ማሳያዎችን በማካተት ካርታ ለመስራት መጋቢት 2008 ዓ.ም ከክልሉ ጋር በተፈጸመው ውል መሰረት መሆኑን ኤጀንሲው ገልጿል።

በኤጀንሲው የፕላንና ፕሮጀክት ዝግጅትና ግምገማ ዋና ዳይሬክተር አቶ ተፈሪ ዋቅቶላ እንድተናገሩት፥ የካርታው ስራ 179 ስኩዌር ኪሎ ሜትር የሸፈነ ሲሆን ከ14 ሚሊየን በላይ ብር ወጪ ተደርጎበታል፡፡

የክልሉ ከተማና ቤቶች ልማት ቢሮ ምክትል ኃላፊ አቶ ይልማ ሱንታ በርክክቡ ወቅት እንደገለጹት፥ ካርታው ለከተሞች እድገት ከፍተኛ አስተዋፅኦ አለው፡፡

ካርታው የተሰራላቸው ከተሞች አለታ ወንዶ፣ ሺንሺቾ፣ ዱራሜ፣ አረካ፣ ለኩ፣ ዳዬ በንሳ፣ ሀደሮ፣ ሳውላ፣ ተርጫና ይርጋጨፌ ናቸው ፡፡

 

 

 

 

ምንጭ፦ኢዜአ