መድረክ አዲስ የሥራ አስፈፃሚ አመራር አባላትን መረጠ

አዲስ አበባ፣ ሀምሌ 10፣ 2009 (ኤፍ.ቢ.ሲ) የኢትዮጵያ ፌዴራላዊ ዴሞክራሲያዊ አንድነት መድረክ ፓርቲ አዲስ የሥራ አስፈፃሚ አመራር አባላትን መረጠ።

መድረክ ሀምሌ 8 2009 የምርጫ ቦርድ ተወካዮች በተገኙበት ባካሄደው 13ኛ ጠቅላላ ጉባኤ ዶክተር ሚሊየን ቱማቶን የግንባሩ ሊቀ መንበር አድርጎ መርጧል።

በተጨማሪም መምህር ጎይተኦም ፀጋዬ የድርጅት ጉዳይ ሀላፊ፣ የግንባሩ ሊቀ መንበር የነበሩት ፕሮፌሰር በየነ ጴጥሮስ የውጭ ግኑኝነት ሀላፊ፣ አቶ ሙላቱ ገመቹ የህዝብ ግንኙነት፣ ራሄል ዋለ የፋይናንስ አስተዳደር እና አቶ ካሕሳይ ዘገየ የግንባሩ ፀሀፊ ሆነው ተመርጠዋል። 

ፓርቲው አዲስ የኦዲት ቁጥጥር አባላት የመረጠ ሲሆን፤ አቶ አለሙ ከይራ ሰብሳቢ፣ ክንፈ ገብረዮሃንስ ፀሓፊ እና አቶ ለገሰ ላንቃሞ አባል ሆነዋል።

አምስቱ የሥራ አስፈፃሚ አመራር አባላት የግንባሩ ምክትል ሊቃነ - መናብርት ሆነው ፓርቲውን ያገለግላሉ።

አዲሶቹ ተሿሚዎች በጠቅላላ ጉባኤ ፊት ቃለ መሃላ ፈፅመዋል።

የፓርቲው አዲሱ የመድረክ ሊቀ መንበር ዶክተር ሚሊዮን ቱማቶ ከምርጫው በኋላ ለጋዜጠኞች በሰጡት መግለጫ እንደገለጹት ፓርቲው በአገሪቷ ህገ መንግስት መሰረት ሰላማዊ ትግሉን አጠናክሮ ይቀጥላል።

ግንባሩ ልማትና ዴሞክራሲን ይበልጥ ለማጎልበት የድርሻውን እንደሚወጣ የገለፁት ዶክተር ሚሊዮን "ከጠላትነት የፀዳ ተቃውሞ ለማካሄድ እንተጋለን" ብለዋል።

የድርጅት ጉዳይ ሀላፊና ተቀዳሚ ምክትል ሊቀ መንበር በመሆን የተመረጡት መምህር ጎይተኦም ፀጋይ በበኩላቸው፥ ፓርቲው የፖለቲካ ምህዳሩን ለማስፋት የሚያደርገውን ትግል አጠናክሮ እንደሚቀጥል ገልፀዋል።

ግንባሩ አሁን እየተካሄደ ወዳለው የኢህአዴግና ተቃዋሚ ፓርቲዎች ድርድር እንደማይመለስ ያረጋገጡት መምህር ጎይተኦም፥ ፓርቲያቸው ከገዢው ፓርቲ ጋር የሁለትዮሽ ድርድር ለማድረግ እየጠበቀ መሆኑን ተናግረዋል።

ግንባሩ ባካሄደው ጠቅላላ ጉባኤ ባለፈው ዓመት የሥራ አፈፃፀም እና የኦዲት ሪፖርቶች ላይ ተወያይቶ አፅድቋል።

የፋይናንስ ችግር እና የተግባር አመራር ድክመት የፓርቲው ቁልፍ ችግሮች እንደነበሩ በሪፖርቱ ተገልጿል።

ግንባሩ የኢትዮጵያ ማህበረ ዴሞክራሲ የደቡብ ህብረት አንድነት ፓርቲ፣ ዓረና ትግራይ ንዴሞክራሲን ንሉኣላዊነትን ፣ የሲዳማ አርነት ንቅናቄ (ሲአን) እና የኦሮሞ ፌዴራላዊ ኮንግረስ (ኦፌኮ) አባል ፓርቲዎችን ያቀፈ ነው።

 

 

 

ምንጭ፦ ኢዜአ