ከሳዑዲ ዓረቢያ የሚመለሱ ኢትዮጵያውያን የግል ንብረቶቻቸውን ከቀረጥ ነጻ እንዲያስገቡ ተፈቀደ

አዲስ አበባ ፣ ሚያዚያ 10 ፣ 2009 (ኤፍ ቢ ሲ) የሳዑዲ ዓረቢያ መንግስት የመኖሪያ እና የስራ ፍቃድ የሌላቸውን የውጭ ሀገራት ዜጎች በዘጠና ቀናት ውስጥ እንዲወጡ ማዘዙን ተከትሎ አዋጁ የሚመለከታቸው ኢትዮጵያውያን ለዓመታት ያፈሯቸው የግል መገልገያ እቃዎች ከቀረጥ እና ታክስ ነፃ እንዲያስገቡ መፈቀዱን የውጭ ጉዳይ ሚኒስቴር ገለጸ።

የሳዑዲ አረቢያ መንግስት ከመጋቢት 21 ጀምሮ እስከ ሰኔ 20 ቀን 2009 ዓ.ም ድረስ በሀገሪቱ የመኖሪያ እና የስራ ፍቃድ የሌላቸው የውጭ ሀገራት ዜጎች ለቀው እንዲወጡ የ90 ቀናት የምህረት አዋጅ አውጇል።

በዚህ የምህረት አዋጅ ውስጥም የኢፌዴሪ መንግስት ኢትዮጵያውያን እንግልት ሳይደርስባቸው በ90 ቀናት ውስጥ ወደ ሀገራቸው እንዲመለሱ በውጭ ጉዳይ ሚኒስቴር የሚመራ ግብረ ሃይል አቋቁሞ ወደ ስራ ከገባ ሰነባብቷል።

ከፋና ብሮድካስቲንግ ኮርፖሬት ጋር በጉዳዩ ዙሪያ ቆይታ ያደረጉት የውጭ ጉዳይ ሚኒስቴር ቃል አቀባይ አቶ መለስ አለም፥ ኢትዮጵያውያን በሳዑዲ ሲኖሩ ያፈሯቸውን የግል መገልገያ እቃዎቻቸውን ይዘው ወደ ሀገራቸው እንዲመለሱ የሚያበረታታ አዲስ ውሳኔ መተላለፉን ተናግረዋል።

ዜጎች ይኖሩበት ከነበረው ሳዑዲ ዓረቢያ ተገደው ሲወጡ ይዘዋቸው የሚመጡት 21 ዓይነት የግል መገልገያ ዕቃዎችን ይዘው ወደ ሀገራቸው እንዲመለሱ እድል መፈጠሩንም ነው የተናገሩት።

በመሆኑም የልብስ ማጠቢያ ማሽን፣ የጋዝ ምድጃ፣ ቴሌቪዥን፣ ኮምፒውተር እና ፕሪንተር እቃዎችን ዝርዝር፥ በሳዑዲ ዓረቢያ ሪያድ እና በአካባቢው በሚገኙ የኢትዮጵያ ሚሲዮኖች ማግኘት ይችላሉ ብለዋል።

አዋጁ የሚመለከታቸው ኢትዮጵያውያን ወደ ሃገር እንዲመለሱ መንግስት ለዜጎች የጉዞ ሰነድ የሚሰጡ ተጨማሪ ማዕከላትን፥ ሪያድ ሚሲዮን፣ ደማም፣ ቡረይዳ እና ዋዲ ደዋስር በጅዳ ቆንስላ ጽህፈት ቤት እና በአካባቢው በመካ ላይ፣ ኸሚስሽጥ፣ ጄዛን እና መዲና መክፈቱንም አንስተዋል።

ከዚህም በተጨማሪ ሪያድ እና ጅዳ የሚገኙ ሚሲዮን እና ቆንስል ፅህፈት ቤቶች የአገልግሎት ተደራሽነታቸውን እያሰፉ መሆኑን ጠቅሰው፥ የሪያድ ሚሲዮን፣ ደማም፣ ቡረይዳ እና ዋዲ ደዋስር አገልግሎቱን ይሰጣል ብለዋል ቃለ አቀባዩ።

በህገ ወጥ መንገድ የሳዑዲን ድንበር አቋርጠው የገቡ፣ ቋሚ ቦታ ሳይኖራቸው በመዘዋወር በህገ ወጥ መንገድ የሚሰሩ፣ የስራ እና የመኖሪያ ፍቃድ ጊዜያቸውን ያጠናቀቁ፣ የስራ ፍቃድ ኖሯቸው ነገር ግን የመኖሪያ ፍቃድ መታወቂያ ካርድ የሌላቸው፣ ለኡምራ እና ሃጂ ጉዞ ሄደው በዚያው የቀሩ ወይም የቆይታ ጊዜያቸው ያለፈባቸው እና ያለሃጂ ፈቃድ የተጓዙ አማኞች በሳዑዲ መንግስት በህገ ወጥነት የሚታዩ ናቸው።

 


በስላባት ማናዬ