የተሃድሶ ስልጠናው በመንግስት ሰራተኞች ላይ የሚስተዋሉ ጉድለቶችን ለማረም እንደሚያስችል ተገለፀ

አዲስ አበባ፣ ጥር 3፣ 2009 (ኤፍ.ቢ.ሲ) የተሃድሶ ስልጠናው በመንግሥት ሰራተኞች ላይ የሚስተዋሉ ጉድለቶችን ለማረም እንደሚያስችል የፐብሊክ ሰርቪስ እና የሰው ሃብት ልማት ሚኒስትሩ አቶ ታገሰ ጫፎ ተናገሩ፡፡

በሀገር ዓቀፍ ደረጃ ለሁሉም የመንግስት ሰራተኛ ስልጠና እየተሰጠ ሲሆን፥ በሰራተኛው ላይ የሚስተዋሉ ችግሮችን ለመቅረፍና የህዝብ አገልጋይነት ስሜትን የተላበሰ ሰራተኛ ለመፍጠር እንደሚያስችል አቶ ታገሰ ተናግረዋል፡፡

ሚኒስትሩ እንደገለጹት የመንግሥት ሰራተኛው ሀገሪቱ በየዘርፉ ባስመዘገበችው እድገት ጉልህ ድርሻ አበርክቷል፡፡

ሆኖም ሰራተኛው የሚጠበቀውን ያህል የህዝብ አገልጋይነት መንፈስን ተላብሶ ለህብረተሰቡ ተገቢውን አገልግሎት ባለመስጠቱ፥ በህብረተሰቡ ዘንድ የመልካም አስተዳደር ጥያቄዎች ሲነሱ ቆይተዋል፡፡

ለህዝብ ጥያቄ ተገቢውን ምላሽ አለመስጠት፥ የህዝብ አገልጋይነት መንፈስን አለመላበስ እንዲሁም ኃላፊነትን ለግል ጥቅም ማዋል በመንግሥት ሰራተኛው ላይ የሚስተዋሉ ዋና ዋና ችግሮች መሆናቸውን አቶ ታገሰ ጠቅሰዋል፡፡

በሀገሪቱ በሁሉም የአስተዳደር እርከን ያለው የመንግሥት መዋቅር በአገልጋይነት መንፈስ ማገልገል ቢችል 70 ከመቶ የሚሆነው ችግር ይፈታል ነው ያሉት ሚኒስትሩ፡፡

ስልጠናው የሀገሪቱ መንግሥት የሚከተለውን የልማትና የዲሞክራሲ አማራጮች ግልጽ ለማድረግና በፐብሊክ ሰርቪሱ አካባቢ የሚታዩ ብዥታዎችን ለማጥራት የጎላ ሚና እንዳለውም አንስተዋል ሚኒስትሩ፡፡

የህዝቡን የልማትና የመልካም አስተዳደር ጥያቄዎች በተሟላ መልኩ የሚመልስ፥ የለውጥ መሳሪያዎችን ሳይንሳዊ በሆነ መልኩ አደራጅቶና አቀናጅቶ ጥቅም ላይ በማዋል

ከሌሎች ሀገራት ጋር ተወዳዳሪ ለመሆን የሚያስችል፥ በአመለካከቱና በክህሎቱ በቁ የሆነ የመንግሥት ሰራተኛ ለመፍጠር የሚደረገው ጥረት ተጠናክሮ ይቀጥላልም ብለዋል አቶ ታገሰ፡፡

ባለፉት ዓመታት ሀገሪቱ ባሳካቻቸው ግቦች የመንግሥት ሰራተኛው ትልቅ አስተዋጽኦ ማበርከቱንም ሚኒስትሩ አውስተዋል፡፡

ለዚህም በመንግሥት መዋቅር ውስጥ እቅድ ከማዘጋጀት ጀምሮ ወደ ተግባር እስከሚመነዘር ያለውን ሂደት በመከታተል፥ አፈጻጸሙን ገምግሞ ለቀጣይ የመንግሥት ውሳኔ በሚያግዝ መልኩ የሚያደራጀው፥ የመንግሥት ሰራተኛው መሆኑን በአብነት አንስተዋል፡፡

እንደ አቶ ታገሰ ማብራሪያ የመንግሥት ሰራተኛውን ለሀገሪቱ ኢኮኖሚያዊ እድገት ባበረከተው አስተዋጽኦ ልክ ተጠቃሚ ለማድረግ በተለያየ ጊዜ የሃገሪቱን የኢኮኖሚ አቅም ያገናዘበ የማስተካከያ እርምጃ ተወስዷል፡፡

በቀጣይም የሀገሪቱን የኑሮ ሁኔታ በማጥናትና የመንግሥትንም የመክፈል አቅም ግምት ውስጥ በማስገባት የመንግስት ሰራተኛውን ኑሮ ለማሻሻል የሚደረገው ጥረት ተጠናክሮ እንደሚቀጥል ነው የፐብሊክ ሰርቪስና የሰው ሃብት ልማት ሚኒስትሩ ያረጋገጡት፡፡

ምንጭ፡- ኢዜአ