የ2018 የዓለም ዋንጫ ተጀመረ

አዲስ አበባ፣ ሰኔ 7፣ 2010 (ኤፍ.ቢ.ሲ) በሩሲያ አስተናጋጅነት የሚካሄደው የ2018 የፊፋ የዓለም እግር ኳስ ዋንጫ ዛሬ በተካሄደ ደማቅ ስነ ስርዓት ተጀምሯል።

የዓለም ዋንጫው በምደብ አንድ የሚገኙት በአስተናጋጇ ሩሲያ እና ሳዑዱ አረቢያ መካከል በሉዝህኒዝኪ ስታዲየም ተበተደረገ ጨዋታ ነው ነው የተጀመረው።

በሩሲያ እና በሳዑዲ አረቢያ መካከል የተደረገው ጨዋታም 45ኛው ደቂቃ ላይ የደረሰ ሲሆን፥ በእስካሁኑ ውጤትም ሩሲያ 1ለ0 ሳዑዲ አረቢያን እየመራች ትገኛለች።

በ21ኛው የሩሲያ የዓለም ዋንጫ ላይ 32 ሀገራት የሚፋለሙ ሲሆን፥ በ32 ቀናት ቆይታም 64 ጨዋታዎች ይካሄዳሉ።

በሩሲያ አስተናጋጅነት የሚካሄደው የ2018 የፊፋ የዓለም እግር ኳስ ዋንጫ ጨዋታዎች በሩሲያ በሚገኙ 11 ከተሞች በተዘጋጁ 12 ስታዲየሞች ውስጥ ነው የሚካሄዱት።

በዘንድሮው የዓለም ዋንጫም የ2014 የዓለም ዋንጫ ያሸነፈችው ጀርመን የሩሲያን የዓለም ዋንጫ በማንሳት በአውሮፓውያኑ ከ1962 ወዲህ የዓለም ዋንጫን ለሁለት ተከታታይ ጊዜ ያነሳች ሀገር የመሆን ተስፋን ሰንቃለች።

ብራዚል ደግሞ የዘንድሮውን የዓለም ዋንጫ በማንሳት ያሸነፈቻቸውን የዓለም ዋንጫ ብዛት ወደ ስድስት በማሳደት ክብረ ወሰኗል ለማስጠበቅ አቅዳለች።

የ20ኛው የዓለም ዋንጫ አሸናፊ ጀርመን፣ የ5 ጊዜ የዓለም ዋንጫ አሸናፊ ብራዚል፣ የ2016 የአውሮፓ ዋንጫ አሸናፊዋ ፖቹጋል፣ የ2014 ዓለም ዋንጫ ለፍፃሜ የደረሰችው አርጀንቲና እንዲሁም ቤልጂየም፣ ፖላንድ እና ፈረንሳይ የዓለም ዋንጫውን የማንሳት ቅድመ ግምት የተሰጣቸው ሀገራት ሆነዋል።

አስተናጋጇ ሩሲያ በፊፋ ወርሃዊ የሀገራት የእግር ኳስ ሰንጠረዥ ምንም እንኳ ከዓለም 70ኛ ደረጃ ላይ ብትቀመጥም የዓለም ዋንጫውን ሀገሯ ላይ ልታስቀር ትችላለች የሚል ግምትም ተሰጥቷታል።

በመጨረሻ ሰዓት አሰልጣኟን ያባረረቸው ስፔን እና ከ8 የዓለም ዋንጫ ተሳትፎ አንዱን ብቻ ማሳካት የቻለችው እንግሊዝም ከሌሎቹ ሀገራት በመቀጠል ግምት ውስጥ ገብተዋል።

በዘንድሮው የሩሲያ የዓለም ዋንጫ ላይ ፓናማ እና አይስላንድ የዓለም ዋንጫ የመጀመሪያ ተሳትፎዋቸውን የሚያደርጉ ሀገራትም ናቸው።

አጠቃላይ የህዝብ ቁጥሯ 335 ሺህ የሆነችው አይስላንድ በዓለም ዋንጫ ታሪክ ትንሽ የህብዝ ቁጥር ያላት የመጀመሪያዋ ተሳታፊ ሀገር መሆንም ችላለች።

ፓናማም በታሪኳ ለመጀመሪያ ጊዜ ለዓለም ዋንጫ ባለፈችበት ጊዜ በሀገሪቱ ብሄራዊ በዓል ታውጆ ተከብሮ እንደነበረም አይዘነጋም።

በአጠቃላይ በዘንድሮው የዓለም ዋንጫ ላይ 32 ሀገራት በስምንት ምድብ ተከፋፍለው የሚፋለሙ ሲሆን፥ አሸናፊው ሀገርም እሁድ ሀምሌ 8 2010 ዓ.ም 81 ሺህ ተመልካች የመያዝ አቅም ባለው በሉዝህኒዝኪ ስታዲየም በሚደረግ ጨዋታ ይለያል።

የ2018 የዓለም ዋንጫ ከ1 ነጥብ 5 ሚሊየን በላይ ደጋፊዎች ወደ ሩሲያ በመጓዝ እንደሚመለከቱት ይጠበቃል።

በተጨማሪም በመላው ዓለም ላይ ከ3 ቢሊየን በላይ ሰዎች በቴሌቪዥን መስኮት የ2018 የሩሲያ ዓለም ዋንጫን ባሉበት ሆነው እንደሚከታተሉም ተገምቷል።

ምንጭ፦ ቢቢሲ 

 

በሙለታ መንገሻ