ከ1200 በላይ ነውጠኛ እንግሊዛውያን ደጋፊዎች ወደ ሩሲያ እንዳይገቡ ታገዱ

አዲስአበባ፣ ሰኔ 6፣ 2010 (ኤፍ.ቢ.ሲ) የዓለም ዋንጫን ለመመልከት የሚፈልጉ ከ1 ሺህ 200 በላይ ጽንፈኛ እንግሊዛውያን ደጋፊዎች ሩሲያ እንዳይገቡ ማገዱን የሀገሪቱ የሀገር ውስጥ ሚኒስትር አስታወቀ፡፡

በጥቅሉ የእንግሊዝ መንግስት 1 ሺህ 312 ጽንፈኛ ደጋፊዎችን ያገደ ሲሆን፥ ከነዚህም መካከል 1 ሺህ 254 ያለመሄዳቸው ተረጋግጧል፡፡

ቀሪዎቹ 58 ግለሰቦች ላይ ፖሊስ ክትትል በማድረግ ላይ መሆኑን አስታውቋል፡፡

በደጋፊዎቹ ላይ በፍርድ ቤት የተጣለው እገዳ እስከ 10 ዓመታት የሚቆይ መሆኑም ተገልጿል፡፡

እገዳውን ተከትሎም በብሪታንያ ዋነኛ ወደቦች ላይ ጽንፈኛ ደጋፊዎች ወደ ሩሲያ እንዳይገቡ ለመከላከል ፖሊስ መሰማራቱ ተገልጿል፡፡

የእንግሊዝ ፖሊሶች ለሩሲያ አቻዎቻቸው መጋቢት ወር ላይ ስነምግባር ያላቸውን ደጋፊዎች ብቻ እንደሚልኩ አረጋግጠውላቸዋል ተብሏል፡፡

በዘንድሮው የ2018 ዓለም ዋንጫ ላይ ለመታደም 10 ሺህ የሚደርሱ እንግሊዛውያን ወደ ሩሲያ እንደሚያቀኑ ይጠበቃል፡፡ 

ይህንን በማስመልከትም የብሪታኒያ የፀጥታ ልዑካን ሩሲያ ከሚገኙ አቻዎቻቸው ጋር በጋራ ለመስራት ወደ ሞስኮ ያቀናሉ ተብሏል፡፡

ከሁለት ዓመታት በፊት ፈረንሳይ ባዘጋጀችው የ2016 የአውሮፓ ዋንጫ ላይ የሩሲያና የእንግሊዝ ደጋፊዎች ቡድኖቻቸው በተጫወቱበት ወቅት መጋጨታቸው ይታወሳል፡፡

 


ምንጭ፦ ቢቢሲ
በአብርሃም ፈቀደ ወደ አማርኛ ተመለሰ