መቐለ ከተማ ከቅዱስ ጊዮርጊስ ያደረጉት ጨዋታ በአቻ ውጤት ተጠናቀቀ

አዲስአበባ፣ ግንቦት፣ 10 2010(ኤፍ.ቢ.ሲ)በኢትዮጵያ ፕሪምየር ሊግ ዛሬ መቐሌ ከተማ ከቅዱስ ጊዮርጊስ ያደረጉት ተስታካካይ ጨዋታ  1 ለ 1 በሆነ አቻ ውጤት   ተጠናቀቀ።

በጨዋታው ባለሜዳዎቹ መቐሌ ከተማዎች በ74ኛው ደቂቃ አማኑኤል ገ/ሜካኤል ባስቆጠራት ግብ መሪ ቢሆኑም አብዱልከሪም ሙሀመድ በ83ኛው ደቂቃ ፈረሰኞችን አቻ ማድረግ ችሏል።

ድሬደዋ ከተማ ወላይታ ድቻን ባስተናገደበት ሌላኛው ተስተካካይ ጨዋታ 1 ለ 0 በሆነ ውጤት አሸነፈ።

ድሬደዋ ከተማ በረከት ሳምኤል በ41ኛው ደቂቃ ባስቆጠረው ጎል ወላይታ ዲቻን በማሸነፍ ሶስት ነጥብ ማግኘት ችሏል።

ፕሪምየር ሊጉን በዘንድሮ አመት የተቀላቀለው ጅማ አባጅፋር በ39 ነጥብ ሲመራው ቅዱስ ጊዮርጊስ በ37 እና መቀሌ ከተማ በ36 ነጥብ ሁለተኛ እና ሶስተኛ በመሆን ይከተላሉ።

በሌላ በኩል   በአዲስ አበባ ስታድየም በተደረገ  የኢትዮጵያ ዋንጫ ጨዋታ ኢትዮጵያ ቡና  ወልዲያ ከተማን በመለያ ምት 5 ለ3 በሆነ ውጤት አሸንፏል።

በዚህ ጨዋታ ለኢትዮጵያ ቡና ሳሙኤል ሳኑሜ በ8ኛው እና አቡበክር ነስሩ በ70ኛው  ደቂቃ ለቡና ግቦቹን ሲያስቆጥሩ  ለወልዲያ  በ17ኛው እና በ45ኛው  ደቂቃ አንዷለም ንጉሴ ግቦችን አስቆጥሯል።

በዚህም መሰረት  ኢትዮጵያ ቡና ለኢትዮጵያ ዋንጫ ሩብ ፋፃሜ  መድረሱን አረጋግጧል።