ተመስገን ዳና የኢትዮጵያ ከ17 አመት በታች ብሔራዊ ቡድን አሰልጣኝ ሆኖ ተሾመ

አዲስ አበባ፣ መጋቢት 4፣ 2010 (ኤፍ.ቢ.ሲ)በታንዛንያ አስተናጋጅነት ለሚካሄደው የ2019 የአፍሪካ የ17 አመት በታች ዋንጫ የማጣርያ ጨዋታዎችን የሚያደርገው የኢትዮጵያ ከ17 አመት በታች ብሔራዊ ቡድን ተመስገን ዳናን ዋና አሰልጣኝ አድርጎ መሾሙ ተገልጿል።

የሀዋሳ ከተማ ከ20 አመት በታች ቡድን አሰልጣኝ የሆነው ተመስገን፥ ባለፉት አመታት በወጣቶች እግርኳስ ላይ ስኬታማ ከሆኑ አሰልጣኞች መካወል ግንባር ቀደሙ ነው።

በ2008 ዓመተ ምህረት ከ17 አመት በታች ቡድኑ ጋር የጥምር ዋንጫ አሸናፊ ሲሆን፥ በ2009 ወደ 20 አመት በታች ቡድኑ አሰልጣኝነት ተሸጋግሮ በድጋሚ ባለድል መሆን ችሏል።

ለ2017 ወድድር የመጨረሻ የማጣርያ ጨዋታ ላይ ደርሶ በማሊ 4 ለ1 በመሸነፍ ከውድድር ውጪ የሆነው ከ17 አመት በታች የኢትዮጵያ ቡድን፥ ቀጣይ የማጣርያ ተጋጣሚዎች በቅርቡ የሚታወቁ ሲሆን በግንቦት ወር ጨዋታው ይጀምራል።

በዚህም ካፍ ባሳለፍነው ክረምት በወሰነው ውሳኔ መሰረት ሀገራት በየዞናቸው የማጣርያ ጨዋታ አድርገው ወደ ውድድሩ እንደሚያልፉ ማሳወቁን ተከትሎ፥ ኢትዮጵያ ከአውሮፓውያኑ 1997 በኋላ ለመጀመርያ ጊዜ ለውድድር የመቅረብ የተሻለ እድል ተፈጥሮላታል።

ምንጭ፦ ሶከር ኢትዮጵያ