በአፍሪካ ሀገር አቋራጭ ሻምፒዮናና በ23ኛው የዓለም ግማሽ ማራቶን ላይ ለሚካፈሉ አትሌቶች አሸኛኘት ተደረገ

አዲስ አበባ፣ መጋቢት 4፣ 2010 (ኤፍ.ቢ.ሲ) የኢትዮጵያ አትሌቲክስ ፌዴሬሽን በ5ኛው የአፍሪካ አገር አቋራጭ ሻምፒዮናና በ23ኛው የዓለም ግማሽ ማራቶን ሻምፒዮና ላይ ኢትዮጵያን ለሚወክሉ የአትሌቲክስ ልኡካን ቡድን ትናንት ምሽት አሸኛኘት አደረገላቸው።

በአራራት ሆቴል በተካሄደው አሸኛነት ሥነ ስርዓቱ ላይ ከሁለቱም የልኡካን ቡድኖች የተወከሉ ሴትና ወንድ አትሌቶች፣ እንዲሁም አሰልጣኞቻቸው ስለነበራቸው የስልጠናና ዝግጅት ጊዜ አስረድተዋል።

በሚጓዙባቸው የውድድር ሜዳዎች ውጤታማ እንደሚሆኑ ቃል ገብተዋል።

የኢትዮጵያ አትሌቲክስ ፌዴሬሽን ፕሬዚደንት አትሌት ኃይሌ ገብረስላሴ በበኩሉ፥ ከሁሉ በፊት ለኢትዮጵያውያን አትሌቶች መለያ መሆን የሚገባው ዲሲፕሊን መሆኑንና በቀጣይ ደግሞ ውጤት እንደሆነ ተናግሯል።

የአትሌቲከሱ ስፖርት አሁን ላይ መሰረት እየያዘ የሚገኝ በመሆኑ ሁሉም የድርሻውን በአግባቡ ሊያበረክት እንደሚገባውም ፕሬዚደንቱ አመልክቷል።

የፌዴሬሽኑ የሥራ አስፈጻሚ ኮሚቴ አባል አቶ በላይነህ ክንዴም፥ አትሌቶቻችን የሚጠበቅባቸው ባለድል መሆን ብቻ እንደሆነና ከድል መልስ ወርቅ፣ ብርና ነሃስ ለሚያስገኙ አትሌቶች የገንዘብ ሽልማት እንደሚያበረክቱ ቃል ገብተውላቸዋል።

የኢትዮጵያ አትሌቲክስ ፌዴሬሽን ፕሬዚደንት አትሌት ኃይሌ ገብረስላሴም አትሌቶቹ ውጤታማ ሆነው ከተመለሱ ተመሳሳይ ሽልማት በግሉ እንደሚያበረክት ቃል መግባቱን ከኢትዮጵያ አትሌቲክስ ፌዴሬሽን ያገኘነው መረጃ ያመለክታል።