ቅዱስ ጊዮርጊስ የእግር ኳስ ክለብ 180 ሺህ ብር የገንዘብ ቅጣት ተላለፈበት

አዲስ አበባ፣ የካቲት 16፣ 2010 (ኤፍ.ቢ.ሲ) የኢትዮጵያ እግር ኳስ ፌዴሬሽን በቅዱስ ጊዮርጊስ እና በአዳማ ከተማ እግር ኳስ ክለቦች ላይ ገንዘብን ጨምሮ የተለያዩ የቅጣት ውሳኔዎችን አሳልፏል።

በ12ኛው ሳምንት የኢትዮጵያ ፕሪምየር ሊግ ተስተካካይ ጨዋታ ቅዱስ ጊዮርጊስ ከአዳማ ከተማ ባደረጉት ጨዋታ አቻ መለያየታቸው ይታወሳል።

በዕለቱ በጨዋታው መገባደጃ ላይ ከተከሰተው ስፖርታዊ ጨዋነት ጋር በተያያዘ የፌዴሬሽኑ ዲሲፕሊን ኮሚቴ ያሳለፈውን የቅጣት ውሳኔ ለክለቦቹ እና ለመገናኛ ብዙሀን ይፋ አድርጓል።

በጨዋታው 86ኛ ደቂቃ ላይ በግራ የካታንጋ ክፍል የተለያዩ ቁሳቁሶችን በመወርወር የተጀመረው ግርግር ለ28 ደቂቃ ጨዋታውን አቋርጦ እየተባባሰ በመምጣት ደጋፊዎችን ለጉዳት ወደዳረገ ረብሻ መሸጋገሩ የሚታወስ ነው።

ይህን ተከትሎም ፌዴሬሽኑ የቅጣት ውሳኔ አሳልፏል።

በዚህ መሰረት ለተፈጠረው ችግር ተጠያቂ የተደረገው ቅዱስ ጊዮርጊስ 180 ሺህ ብር ቅጣት፣ የንብረት ጉዳት ወጪ እና የተጎዱ ደጋፊዎችን የህክምና ወጪ እንዲሸፍን ተወስኖበታል።

በተጨማሪም በሜዳው የሚያደርገውን አንድ ጨዋታ በዝግ ስታድየም እንዲያካሂድም ውሳኔ አሳልፏል።

ከቅዱስ ጊዮርጊስ በተጨማሪ የእንግዳው ቡድን አዳማ ከተማ ደጋፊዎች የረብሻው አካል በመሆናቸው የ25 ሺህ ብር ቅጣት ተላልፎባቸዋል።

 

 

ምንጭ፦ soccerethiopia.net