ዋሊድ አታ ራሱን ከእግር ኳስ ጨዋታ አገለለ

አዲስ አበባ፣ ጥር 12፣ 2010 (ኤፍ.ቢ.ሲ) ላለፉት 14 ዓመታት እግር ኳስን የተጫወተው የመሃል ተከላካዩ ዋሊድ አታ ጫማውን መሰቀሉን አስታውቋል።

የመሃል ተከላካዩ በህዳር ወር የሳውዲ አረቢያ ክለብ የሆነው አል ካሊጅ ጋር የነበረውን ውል በስምምነት ካፈረሰ በኃላ ወደ ስዊድን ተመልሶ ሌሎችን ክለቦችን እንደሚቀላቀል ቢጠበቅም እግርኳስን ማቆም የመጀመሪያ ምርጫው አድርጓል።

የ31 ዓመቱ ተጫዋች እግርኳስን ማቆም የወሰነበትን ምክንያት ከጉዳት ጋር የተያያዘ እንዳልሆነም አስረድቷል፡፡

“እግርኳስን ማቆም ያሰብኩት ቀድም ብዬ ነው፤ ከአል ካሊጅ ከለቀቅኩ በኃላ ወደ ሌሎች ክለቦች የማምራት እድሎችን ቢኖሩም ማቆም እንዳለብኝ እራሴን አሳምኜ ነው ያደረግኩት" ይላል ዋሊድ።

ዋሊድ ከዚህ በኃላም ከእግርኳስ ሳይርቅ በተጫዋቾች ወኪልነት እንደሚሰራ ተናግሯል፡፡ 

“ወደ ኢትዮጵያ ተመልሼ መጥቼ ኢትዮጵያዊያን ተጫዋቾችን መርዳት እፈልጋለው” ሲልም ዋሊድ አስታውቋል።

በ12 ክለቦች የተጫወተው ዋሊድ በሳለፈው የእግርኳር ህይወቱ ሁሌም ደስተኛ እንደሆነ ይናገራል፡፡

ዋሊድ ይናገራል፥ “ከኤአልኤ ጋር የሊግ እና የሱፐር ካፕ፤ ከሄልሰንበርግ ጋር የሱፐር ካፕ ዋንጫን አሸንፊያለው፤ በተለያዩ ሃገራት ከመጫወቴ በተረፈ የኢትዮጵያን መለያ ለብሼ ለብሄራዊ ቡድን መጫወት ለእኔ የስኬቶቼ መገለጫዎች ናቸው”።

በሪያድ ከኢትዮጵያዊ እናት እና ኤርትራዊ አባት የተወለደው ዋሊድ ከኤአይኬ እና ሄልሰንበርግ ጋር በስዊድን ዋንጫዎችን ያሸነፈ ሲሆን ከሁለቱም ክለቦች ጋር በቻምፒየንስ ሊግ የቅድመ ማጣሪያ ጨዋታዎችን ማድረግ ችሏል። 

እንዲሁም ከሄልሰንበርግ ጋር የዩሮፓ ሊግ የምድብ ጨዋታዎችን አድርጓል፤ ለስዊድን ከ20 ዓመት በታች ብሄራዊ ቡድንም ተሰልፎ የተጫወተው ተከላካዩ ከ5 አመታት በፊት ኢትዮጵያን ለመወከል ፍላጎት ማሳየቱን ተክተሎ አራት ግዜ በአፍሪካ ዋንጫ ማጣሪያ ጨዋታዎች ላይ መሰለፍ ችሏል።

 

ምንጭ፦ ሶከር ኢትዮጵያ