ብራዚላዊው ካካ ራሱን ከእግር ኳስ ዓለም አገለለ

አዲስ አበባ፣ ታህሳስ 9፣ 2010 (ኤፍ.ቢ.ሲ) የቀድሞ የኤሲ ሚላን እና የሪያል ማድሪድ የመሃል ስፍራ ተጫዋች እና ከሀገሩ ብራዚል ጋር የዓለም ዋንጫን ያነሳው የመሃል ስፍራ ተጫዋች ካካ ራሱን ከእግር ኳሱ ዓለም አገለለ።

የእግር ኳስ ህይወቱን በብራዚሉ ሳኦፖሎ ክለብ ውስጥ የጀመረው የ35 ዓመቱ ካካ፤ እግር ኳስ መጫወት ማቆሙን ይፋ እስካደረገበት ጊዜ ድረስ በአሜሪካው ኦርላንዶ ሲቲ የእግር ኳስ ክለብ ውስጥ በመጫወት ላይ ነበር።

ካካ የመጨረሻውን የእግር ኳስ ጨዋታውን ባሳለፍነው ጥቅምት ወር ያደረገ ሲሆን፥ በአሁኑ ጊዜም በሚላን የሚገኝ የሴሪ ኤ ክለብ ውስጥ የዳይሬክተርነት ስፍራ ተሰጥቶታል ነው የተባለው።

የዓለም ዋንጫ፣ የአውሮፓ ቻምፒየንስ ሊግ እና የባላንድኦር አሸናፊ ከሆኑ የዓለማችን ስምንት ተጫዋቾች ውስጥም ካካ አንዱ ነው።

ካካ በትናንትናው እለት በትዊተር ገፁ ላይ ባሰፈረው ጽሁፍም፥ ለእስካሁኑ ቆይታው ለረዳው ፈጣሪ ምስጋናውን በማቅረብ ለቀጣይ ጉዞው ዝግጁ መሆኑን ጠቅሷል።

በሜዳ ላይ ባለው ልዩ የፈጠራ ችሎታው እና ግብ አስቆጣሪነቱ የሚታወቀው ካካ ለሀገሩ ብራዚል 92 ጊዜ ተሰልፎ የተጫወተ ሲሆን፥ 29 ጎሎችን ከመረብ አሳርፏል።

ካካ እንደ አውሮፓውያኑ አቆጣጠር በ2002 የዓለም ዋንጫን ከሀገሩ ብራዚል ጋር ማንሳት ያቸለ ሲሆን፥ በአውሮፓውያኑ 2007 ደግሞ የቻምፒየንስ ሊግ ዋንጫን ከጣሊያኑ ኤሲ ሚላን ክለብ ጋር በመሆን ማንሳት ችሏል።

እንዲሁም በተመሳሳይ ዓመት ካካ የዓለም ምርጥ ተጫዋች በሚል ተመርጦ የፊፋ ባላንድኦር ዋንጫ ተሸላሚ ለመሆንም በቅቷል።

በጣሊያን በነበረው ቆይታም የሴሪ ኤ ዋንጫን እና የዓለም የክለብ ዋንጫንም ማንሳት ችሏል።

እንደ አውሮፓውያኑ አቆጣጠር በ2009 የዓለም ክብረ ወሰንን በሰበረ የዝውውር ዋጋ በ56 ሚሊየን ፓውንድ የስፔኑ ሪያል ማድሪድን የተቀላቀለው ካካ፤ በክለቡ በነበረው ቆይታም የኮፓ ዲላሬ እና የላሊጋ ዋንጫን አንስቷል።

 

ምንጭ፦ www.bbc.com