የጅማ አባ ቡና አቤቱታን በተመለከተ እርምጃ ለመውሰድ የፍትህ አካል ውሳኔን እየተጠባበኩ ነው- ፌዴሬሽኑ

አዲስ አበባ፣ ጥቅምት 1፣ 2010 (ኤፍ.ቢ.ሲ) የኢትዮጵያ እግር ኳስ ፌዴሬሽን የጅማ አባ ቡናን የእግር ኳስ ክለብ ያቀረበውን አቤቱታ በተመለከተ እርምጃ ለመውሰድ የፍትህ አካል የሚሰጠውን ውሳኔ በመጠባበቅ ላይ መሆኑን ገለፀ።

የኢትዮጵያ እግር ኳስ ፌዴሬሽን በትናንትናው እለት ጅማ አባቡና “በኤሌክትሪክና በሀዋሳ ከተማ መካከል የተደረገው የኢትዮጵያ ፕሪምየር ሊግ የመጨረሻ ጨዋታ ውጤት የማስለወጥ ተግባር ታይቶበታል” በሚል ያቀረበው ክስ ላይ መግለጫ አውጥቷል።

በመግለጫውም "ፌዴሬሽኑ ያዘገየው ውሳኔ የለም፤ ጎዳዩ ለአቃቢ ህግ የተላከ ሲሆን፥ የፍትህ አካል የሚሰጠውን ውሳኔ ፌዴሬሽኑ በመጠባበቅ ላይ ይገኛል” ብሏል።

ክለቡ “ደባ ተሰርቶብኛል” በማለት ያቀረበውን አቤቱታ በተመለከተ በየደረጃው የማጣራት ሥራ ተከናውኗል ያለው ፌዴሬሽኑ፥ ይሁንና በአንዳንድ መገናኛ ብዙሀን ምንም እንዳልተሰራና ውሳኔ ያልተሰጠ እየተነገረ ይገኛል ብሏል።

የውድድሩ ዘመን በተፈፀመ ማግስት የሁሉም ተወዳዳሪ ክለቦች ውጤት ተገልጿል ያለው ፌዴሬሽኑ፥ የጅማ አባቡና ክለብ ምንም እንዳልደረሰው ወይም እንደማያውቅ ተደርጐ መገለፁ ትክክል አለመሆኑን ገልጿል።

የኢትዮጵያ እግር ኳስ ፌዴሬሽን የጅማ አባቡናን አቤቱታ ዙሪያም ከሚመለከታቸው የክለቡ ኃላፊዎችና ከባለድርሻ አካላት ጋር መወያቱንም አስታውቋል።
በዚሁ መሠረት በፌዴሬሽኑ በኩል የሚከተሉት ዕርምጃዎች መወሰዳቸውንም አስታውቀውል፦

1ኛ. የጅማ አባቡና እግር ኳስ ክለብ ከጨዋታ ውጤት ማስለወጥ ጋር ተያይዞ ላቀረበው ጥያቄ ማስረጃ እንዲያቀርብ በቁጥር 2/ኢ.እ.ፌ.አ-9/1280 በቀን 14/10/2009 ዓ.ም በተጻፈ ደብዳቤ ተጠይቋል

2ኛ. የደቡብ ክልል ፖሊስ ኮሚሽንና የሀዋሳ ከተማ እግር ኳስ ክለብ ማስረጃዎችን እንዲልኩ ለሁለቱም ተቋማት በቁጥር 2/ኢ.እ.ፌ-አ.9/1328 በቀን ሐምሌ 26/10/2009 ዓ.ም በተፃፈ ደብዳቤ ተጠይቋል

3ኛ. ኢትዮ ቴሌኮም ማስረጃዎችን እንዲልክ በ20/11/2009 እና 17/12/09 በተፃፉ ደብዳቤዎች ጥያቄ ቀርቧል

4ኛ. አጣሪ ኮሚቴ በመሰየም የማጣራት ስራ እንዲከናወን ተደርጓል፣ ሪፖርት ተጠናቅሮና ጋዜጣዊ መግለጫ ተሰጥቷል

5ኛ. ማስረጃዎችን በማሰባሰብና በማደራጀትም ጉዳዩ በዲሲኘሊን ኮሚቴ እንዲታይ አስፈላጊው መመሪያ ተሰጥቷል

6ኛ. ለጅማ አባቡና እና ለሚመለከታቸው አካላት ፌዴሬሽኑ አቤቱታውን በአግባቡ እየመረመረ ስለመሆኑ በጹሁፍና በስልክ ተደጋጋሚ መረጃ ተሰጥቷል

7ኛ. የዲሲኘሊን ኮሚቴ በ22/12/09 ዓ.ም ያቀረበውን የውሳኔ ሃሳብ መሰረት በማድረግም 29 ገፅ ሰነዶችና አንድ ሲዲ ለፌዴራል ፖሊስ ኮሚሽን በቀን 23/12/09 ዓ.ም እንዲላክ ተደርጓል

8ኛ ጉዳዩ ወደ ፌዴራል ወንጀል ምርመራ ቢሮ መላኩን ተከትሎም ተከታታይ ክትትል ከማድረግ በተጨማሪ የኮሚሽነሮችና ዳኖች ሪፖርቶች እና ሌሎች የጹሁፍ ማስረጃዎተን ጨምሮ 12 ምስክሮች በአካል ቀርበው ቃላቸውን እንዲሰጡ ተገቢውን ክትትልና ጥረት አድርጓል

9ኛ. የፖሊስ ምርመራ መጠናቀቁን ተከትሎም መዝገቡ በ24/01/10 ለአቃቢ ህግ የተላከ ሲሆን፥ የፍትህ አካል የሚሰጠውን ውሳኔ በመጠባበቅ ላይ እንደሚገኝ አስታውቀቋል።
የሚሰጡት ውሳኔዎች የሚያስጠይቁ ሆነው ከተገኙ የእግር ኳስ ፌዴሬሽን በደንቡ መሠረት ዕርምጃ እንደሚወሰድም የኢትዮጵያ እግር ኳስ ፌዴሬሽን ያወጣው መግለጫ ያመለክታል።

ይሁን እንጂ ከላይ በተገለፀው መሰረት የሀዋሳ ከተማ እና የኢትዮጵያ ኤሌክትሪክ የዕለቱ ውጤት ቀደም ሲል የፀደቀ መሆኑን በማስታወስ፤ በፌዴሬሽኑ በኩል የዘገየ ውሳኔ አለመኖሩን ገልጿል።

ጅማ አባቡናም ሆነ ሌሎች በኢትዮጵያ እግር ኳስ ፌዴሬሽን ተመዝግበው የሚገኙ ክለቦች በሚወዳደሩበት ሊግ ለ2010 ዓ.ም ውድድር ዝግጅት ከነሐሴ 1 2009 ጀምሮ እስከ ጥቅምት 5 2010 ዝግጅት እንዲያደርጉና እንዲመዘገቡ ነሃሴ 24 2009 በተፃፈ ደብዳቤ ተገልጾላቸዋል፡፡

በእጣ አወጣጥ ስነ ስርአት ላይም ኢትዮጵያ ኤሌክትሪክ የተገኘ ሲሆን፥ ጅማ አባቡና በተመደበበት ሊግ ሳይገኝ ቀርቷል።