የ84 ዓመቱ አዛውንት በእድሜ ትልቁ የሰውነት ቅርፅ ተወዳዳሪ መሆን ችለዋል

አዲስ አበባ፣ ጳጉሜን 3፣ 2009(ኤፍ ቢ ሲ) የ84 ዓመቱ አዛውንት በዓለም በእድሜ ትልቁ የሰውነት ቅርፅ ተወዳዳሪ በመሆን ስማቸውን በአለም የድንቃ ድንቅ መዝገቦች አስፍረዋል።

የካሊፎርኒያ ነዋሪ የሆኑት አዛውንቱ ጂም አሪንግተን በእርጅና ዘመናቸው የሰውነት ቅርፅ ውድድር፥ የያዙት ክብረወሰን በ2018 በሚዘጋጀው የዓለም ድንቃድንቅ መዝገብ ላይ እንደሚፀና ታውቋል።

በፈረንጆቹ 1932 የተወለዱት እኝህ አዛውንት በ84 ዓመታቸው የሰውነት ቅርፅ ውድድር በማድረግ ላይ ይገኛሉ።

ዘወትርም የሰውነታቸውን ቅርፅ የሚያሳምሩበትንና ጡንቻቸውን የሚያዳብሩ ስፖርቶችን ይሰራሉ።

ሰውነትን በስፖርት መገንባት ዘወትር የማደርገውና የምወደው የየዕለት ተግባር ነው፤ ከ80 ዓመት በላይ እድሜ ኖሯቸው በሰውነት ቅርፅ ውድድር ስኬታማ የሆኑ ሰዎችን ጎራ ለመቀላቀልም ስጥር ነበር ብለዋል።

በዓለም የድንቃድንቅ መዝገብ ላይ ስሜ በመስፈሩም ደስታየ ወሰን የለውም ይላሉ።

ቤተሰቦችና ወዳጅ ዘመድ ሁሉ በጣም ደስተኛ ሆነዋል፤ ብዙ ሰዎች ደግሞ የዓለም የድንቃድንቅ መዝገብ አስተዳደር የሰጣቸውን የእውቅና የምስክር ወረቀት እንደያዙ አብረዋቸው ፎቶግራፍ እንደሚነሱም ጠቅሰዋል።

ለ70 ዓመታት ያህል የሰውነት ቅርፅን የሚገነቡ ስፖርቶችን ሲሰሩ የኖሩት አዛውንት፥ በ62 ውድድሮች ተሳትፈው 16 ጊዜ አሸንፈዋል።

የመጀመሪያ ክብረወሰናቸው የያዙት በፈረንጆቹ 2015 ነበር።

የሰውነታቸውን ቅርፅ ለማስጠበቅም በየቀኑ የሚወስዱትን የምግብ መጠንና የሚሰሩትን የስፖርት ዓይነት ሳይሰለቹ ተግባራዊ በማድረጋቸው ለስኬት መብቃታቸውን ገልፀዋል።

ምንጭ፦ ዩናይትድ ፕረስ ኢንተርናሽናል