ታይላንዳዊቷ አዛውንት በ91 ዓመታቸው በመጀመሪያ ዲግሪ ተመረቁ

አዲስ አበባ፣ ነሐሴ 5፣ 2009 (ኤፍ ቢ ሲ) ታይላንዳዊቷ አዛውንት ኪምላን ጂናኩል በ91 ዓመታቸው የመጀመሪያ ዲግሪያቸውን ከሀገሪቱ ንጉስ ተቀብለዋል፡፡

ለዚህ ስኬት ለመብቃት በመንግስት ስር በሚተዳደረው የሱኮታይ ታማቲራት ዩኒቨርሲቲ ላለፉት 10 ዓመታት የዲግሪ ትምህርታቸውን ተከታትለዋል፡፡

የታይላንድ ቴሌቪዥን ብሮድካስተር (ታይ ፒ ቢ ኤስ) ይፋ ባደረገው መረጃ፥ ኪምላን ጂናኩል በ"ሂዩማን ኤንድ ፋሚሊ ዴቭሎፕመንት" የትምህርት መስክ ነው የመጀመሪያ ዲግሪ ያገኙት፡፡

አዛውንቷ "ካላጠናን፣ ካላነበብን እንዲሁም ካላወቅን መናገርም ሆነ ነገሮችን ማገናዘብ አንችልም" ሲሉ ተደምጠዋል፡፡

ባለፈው ዓመት የነገሱት የታይላንዱ ንጉስ ማሃ ቫጂራሎንግኮርን ለአዛውንቷ ዲግሪውን አስረክበዋል፡፡

በሀገሪቱ የመንግስት ዩኒቨርሲቲዎች የሚመረቁ ተማሪዎች ዲግሪያቸውን ከንጉሳዊ ቤተሰብ የመቀበል ልማድ አለ፡፡

ተመራቂዋ አዛውንት ኪምላን "ከንጉሱ ዲግሪዬን በመቀበሌ እጅግ ደስ ብሎኛል" ነው ያሉት፡፡

የኪምላን ቤተሰቦች በምረቃ ስነ ስርዓቱ ለመታደም ከፋያዎ ግዛት ተነስተው 725 ኪሎሜትሮችን ተጉዘዋል፡፡

ወንድ ልጃቸው ሞንግኮል ጂናኩል ስለ እናቱ፥ አንዳንድ ጊዜ በእርጅናዋ ምክንያት እንደትጨነቅ ተናግሮ "እኛ ልጆቿ ግን እናታችን እስከ እድሜሽ ፍጻሜ ድረስ ማጥናትና መማር ትችያለሽ እያልን እናበረታታት ነበር" ብሏል፡፡

የሱኮታይ ታማቲራት ዩኒቨርሰቲ እድሜያቸው ገፋ ላሉ ሰዎች የሚሆን የትምህርት መርሃ ግብር ከፍቶ እያስተማረ ይገኛል፡፡

በአሁኑ ወቅትም እድሜያቸው ከ66 ዓመት በላይ የሆናቸው 199 አዛውንት ተማሪዎች በዩኒቨርሲቲው ትምህርታቸውን እየተከታተሉ ነው፡፡

የዩኒቨርሲቲው ተወካይ ፕሮፌሰር ፓኑማስ ካድንጋዎጋም፥ በትምህርት ቤታችን ለአዛውንቶች የምንሰጠው ትምህርት ተግባር ላይ ያተኮረ ነው ብለዋል፡፡

 

 

 

 

 

ምንጭ፡-አልጀዚራ