አሜሪካ ጥይትን ወደ ዕፅዋት የሚቀይሩ ተመራማሪዎች እያፈላለገች ነው

አዲስ አበባ፣ ጥር 2፣ 2009 (ኤፍ.ቢ.ሲ) ዓለም በአየር ንብረት ለውጥ እየተጨነቅች ነው።

ይህን ተከትሎ የዓለም የደህንነት ስጋትም ተባብሷል፤ ሀገራት በአካባቢ ጥበቃ እና በአየር ንብረት ለውጥ ላይ ለበርካታ ጊዜ መምከራቸውም የዚህ ማሳያ ነው።

በጦርነት አውድማዎች እና በማሰልጠኛ ስፍራዎች የሚንጣጡ ጥይቶች የሰውን ህይወት ከመቅጠፋቸው በተጨማሪ፥ የአየር ብክለትን ያመጣሉ።

በዚህም ሙቀትን፣ የውሃ መመረዝን እና ሌሎች ችግሮችን የሚስከትሉ ሲሆን፥ የሰው እና የእንስሳት ሕይወትን ለጉዳት ይዳርጋሉ።

የአሜሪካ የመከላከያ ሚኒስቴር በቅርቡ በጥይት ማምረት ለተሰማሩ ተቋማትና የፈጠራ ባለሙያዎች አንድ ሀሳብ አቅርቧል፡፡

ይህም የዓለምን ሰላማዊ ህዝብ ከጥፋት ኃይሎች ለመታደግ እና የስነምህዳር መጠበቅን የሚያመጣ ጥይትን መስራት የሚችሉ ሰዎች ካሉ ወደ እኔ ይምጡ የሚል ነው ተብሏል፡፡

አሁን ላይ በጥቅም ላይ ያሉት የጥይት አይነቶች ወደ መሬት ከወደቁ በኋላ ሳይበሰብሱ በርካታ ዓመታትን በዝገት ይቆያሉ፤ በዚህም አፈርን ይበክላሉ፡፡

ከላይ የጠቀስናቸውን ጉዳቶች ለመቀነስ በሚል፥ የመከላከያ ሚኒስቴሩ መበስበስ እና ወደ ዘር ተቀይሮ እፅዋትን ማብቀል የሚችል ጥይትን የሚያመርት ግለሰብ ወይም ተቋምን በመጥራት ላይ ይገኛል።

"ይህንን እኔ አደርጋለሁ" የሚል ባለ መልካም ሀሳብም እቅዱን ማስገባት የሚችል ሲሆን በተግባሩም ዓለም ታወድሰዋለች ተብሏል፡፡

ገዳዩ ጥይት ህይወት እንዲሰጥ መታቀዱ ምፀት ቢመስልም ተቋሞቹ ያቀረቡት ሀሳብ ብዙዎችን አስገርሟል ነው የተባለው፡፡

በሚኒስቴሩ የስሞል ቡዝነስ ኢኖቬሽን ሪሰርች ያወጣው ጨረታ ጉዳት አምጪ ጥይቶችን እፅዋትን በሚያበቅሉ ጥይቶች ለመቀየር ያለመ ነው።

መረጃው እንደሚያሳየው እነዚህ ጥይቶች ጥቅም ላይ ከዋሉ በኋላ በወራት እድሜ ውስጥ መበስበስ እና መብቀል እንዲችሉ ሆነው መሰራት ይርባቸዋል ተብሏል፡፡

የመከላከያ ሰዎች አዲሱን ጥይት ለማምረት ከአካባቢ ጋር ቶሎ የሚላመደው የቀርከሃ ምርት በግብዓትነት ሊውል እንደሚችል ፍንጭ ሰጥተዋል፡፡

ጥይቶቹ የሚያበቅሉት እፅዋት ለእንስሳት ምግብነት የሚያገለግል እንዲሁም የአፈር ብክለትን የሚቀንስ መሆን እንዳለበትም ተጠቅሷል፡፡

የአሜሪካ የመከላከያ ሚኒስቴር የአየር ንብረት ለውጥ ለወታደራዊ ስራዎቼ እንቅፋት እየሆነ ነው ማለቱ ይታወቃል፡፡

 

ምንጭ፡- www.huffingtonpost.com

በምህረት አንዱዓለም