የግንቦት ወር አጠቃላይ የዋጋ ግሽበት 13 ነጥብ 7 በመቶ ሆኖ ተመዘገበ

አዲስ አበባ፣ ግንቦት 30፣ 2010 (ኤፍ.ቢ.ሲ) በግንቦት ወር አጠቃላይ የዋጋ ግሽበት 13 ነጥብ 7 በመቶ ሆኖ መመዝገቡን የማዕከላዊ ስታቲስቲክስ ኤጀንሲ አስታወቀ።

ኤጀንሲው ለፋና ብሮድካስቲንግ ኮርፖሬት በላከው መግለጫ መሰረት የዋጋ ግሽበቱ ካለፈው ወር ጋር ሲነፃፀር ተመሳሳይ ሆኖ ተመዝግቧል።

የግንቦት ወር ምግብ ዋጋ ግሽበት 14 ነጥብ 9 በመቶ ሆኖ ሲመዘገብ፤ ምግብ ነክ ያልሆኑ ሸቀጦች ዋጋ ደግሞ ወደ 12 ነጥብ 2 በመቶ ሆኖ ተመዝግቧል።

ካለፈው ወር ጋር ሲነጻጸር በያዝነው ወር የእህል ክፍሎች እና አትከልትና ፍራፍሬ በአጠቃላይ ብዙ ለውጥ አልታየም።

የበርበሬ ዋጋ ወደቀድሞው የዋጋ መጠን ያልተመለሰ ቢሆንም በያዝነው ወርም ቅናሽ አሳይቷል።

በሌላ በኩል ሥጋ፣ ቅቤ፣ ወተት፣ አይብና ዕንቁላል ዋጋ ላይ ጭማሪ ታይቷል።

ምግብ ነክ ያልሆኑ ሸቀጦች ደግሞ አልባሳትና ጫማ፣ የቤት ማደሻ እና ማስዋቢያ ቁሳቁሶች፣ የሀይል ፍጆታዎች እንዲሁም በሆቴሎች የሚወሰዱ ምግቦችና መጠጦች ላይ ጭማሪ ታይቷል።

ሆኖም ግን በጫት ላይ በተለይ በአምራች ክልሎች ቅናች መታየቱን ኤጀንሲው ገልጿል።