በኢትዮጵያ የተመረቱ ሴራሚክ ውጤቶች ለመጀመሪያ ጊዜ ለውጭ ገበያ ቀረቡ

አዲስ አበባ፣ ሚያዚያ 30፣ 2010 (ኤፍ.ቢ.ሲ) በኢትዮጵያ የተመረቱ ሴራሚክ ውጤቶች ለመጀመሪያ ጊዜ ዛሬ ለውጭ ሀገር ገበያ መቅረብ ጀመሩ።

በኢስተርን ኢንዱስትሪ ዞን በሚገኘው ዲ ዩዋን ኩባኒያ ያመረተው የሴራሚክ ውጤቶች ምርት ነው ለውጭ ገበያ መቅረብ የጀመረው።

ኩባንያው ምርቱን በዛሬው እለት ለመጀመሪያ ጊዜ ወደ ሶማሊ ላንድ የላከ ሲሆን፥ በዚህም ለሀገሪቱም ለኩባንያውም የመጀመሪያ የሆነው 4 ሺህ ካሬ ሜትር ሴራሚክ ተልኳል።

ዲ ዩዋን ኩባንያ የሽያጭ ክፍል ስራ አስኪያጅ ሚስተር ዊሊያም ዌንግ፥ ኩባንያው ቀደም ብሎ በተለያዩ የጎረቤት ሀገሮች ምርቶቹን የማስተዋወቅ እና ገበያ የማፈላለግ ስራ ሲሰራ መቆየቱም ተናግረዋል።

በዚህም ሶማሊ ላንድ፣ ኬንያ፣ ጂቡቲ እና ሱዳን ምርቶቹን ለመግዛት ፍላጎት አሳይተዋል ያሉት ሚስተር ዊሊያም፥ በዛሬው እለትም የመጀመሪያው የሴራሚክ ውጤቶች ምርት ወደ ሶማሊ ላንድ ተልኳል ነው ያሉት።

በቀጣይም ወደ ኬንያ፣ ጂቡቲ እና ሱዳን የሴራሚክ ውጤቶች ምርትን የመላክ ስራ ይሰራል ብለዋል።

በእነዚህ ሀገራትም ወደ 1 ሚሊየን የአሜሪካ ዶላር ገቢ የሚያስገኝ ትእዛዝ ተቀብለናል ብለዋል የሽያጭ ክፍል ስራ አስኪያጁ ሚስተር ዊሊያም።

ከዚህ በተጨማሪም ኩባንያው ለሀገር ውስጥ ገበያ ምርቶችን ከማቅረብ ባለፈ ከውጭ ሀገራት ወደ ኢትዮጵያ የሚገቡ የሴራሚክ ምርቶችን እና ለዚህ የሚወጣውን የውጭ ምንዛሬን ለማስቀረት በከፍተኛ አቅም እየሰራ ነው ብለዋል።

መንግስት ለውጭ ሀገር ባለሀብቱ የሚያደርገው ማበረታቻ እና ድጋፍ ትልቅ እገዛ እንዳደረገላቸውም ሚስተር ዊሊያም አስታውቀዋል።

የሴራሚክ ውጤቶች አምራቹ ዲ ዩዋን እንደ አውሮፓውያኑ አቆጣጠር በ2016 ነው በ218 ሚሊየን የአሜሪካ ዶላር ካፒታል በኦሮሚያ ክልል ዱከም ከተማ አካባቢ በሚገኘው ኢስተርን ኢንዱስትሪ ፓርክ ውስጥ የተቋቋመው።

ኩባንያው የወለል እና የግድግዳ የሴራሚክ ምርቶችን በማምረት ላይ ይገኛል።

ኩባንያው በአሁኑ ወቅት በቀን 30 ሺህ ካሬ ሜትር ሴራሚክስ የሚያመርት ሲሆን፥ ከሁለት ወራት በኋላ ወደ 60 ሺህ ካሬ ሜትር ለማሳደግ እየሰራ መሆኑን ሚስተር ዊሊያም አስታውቋል።

በቤተልሔም ጥጋቡ