የመጋቢት ወር አጠቃላይ የዋጋ ግሽበት15 ነጥብ 2 በመቶ ሆኖ ተመዘገበ

አዲስ አበባ፣ መጋቢት 27፣ 2010 (ኤፍ.ቢ.ሲ) በመጋቢት ወር አጠቃላይ የዋጋ ግሽበት 15 ነጥብ 2 በመቶ ሆኖ መመዝገቡን የማዕከላዊ ስታቲስቲክስ ኤጀንሲ አስታወቀ።

ኤጀንሲው ለፋና ብሮድካስቲንግ ኮርፖሬት በላከው መግለጫ መሰረት የዋጋ ግሽበቱ ካለፈው ወር ጋር ሲነፃፀር ቅናሽ አሳይቷል።

የመጋቢት ወር ምግብ ዋጋ ግሽበት 19 ነጥብ 9 በመቶ ሆኖ ሲመዘገብ፤ ምግብ ነክ ያልሆኑ ሸቀጦች ዋጋ ደግሞ ወደ 10 ነጥብ 0 በመቶ ከፍ ብሏል ሆኖ ተመዝግቧል።

በያዝነው ወር ካለፈው ወር ጋር ሲነጻጸር ከእህል ክፍሎች አብዛኛዎቹ ጭማሪ ያሳዩ ሲሆን፥ የጥራጥሬ፣ የአትከልትና የፍራፍሬ ዋጋ በመጠኑ ጨምሯል።

የቅመማ ቅመም ዋጋ ከሌላው ጊዜ የበለጠ ጭማሪ በማሳየቱ ለምግብ ነክ ዋጋ ግሽበቱ መጨመር አስተዋጽኦ አድርጓል።

ሆኖም የበርበሬ ዋጋ ወደቀድሞው የዋጋ መጠን ያልተመለሰ ቢሆንም፤ በያዝነው ወር መጠነኛ ቅናሽ አሳይቷል፤።

እንዲሁም ወተት፣ አይብና ዕንቁላል ዋጋ ላይ ቅናሽ ማሳየቱን ኤጀንሲው አስታውቋል።

ምግብ ነክ ያልሆኑ ሸቀጦች ደግሞ በጫት፣ አልባሳትና ጫማ፣ የቤት ማደሻ እና ማስዋቢያ ቁሳቁሶች (በተለይ የቤት ክዳን ቆርቆሮ)፣ የሀይል ፍጆታዎች፣ የቤት ውስጥ መገልገያዎች እንዲሁም በሆቴሎች የሚወሰዱ ምግቦችና መጠጦች ላይ ጭማሪ በማሳየቱ ለዋጋ ግሽበቱ መጨመር አስተዋጽኦ እንዳደረገ ኤጀንሲው ገልጿል።