በየካቲት ወር የነዳጅ ምርቶች ዋጋ በነበረበት ይቀጥላል

አዲስ አበባ፣ ጥር 29፣ 2010 (ኤፍ ቢ ሲ) የየካቲት ወር የነዳጅ ምርቶች የችርቻሮ መሸጫ ዋጋ ባለበት እንደሚቀጥል የንግድ ሚኒስቴር አስታወቀ።

ሚኒስቴሩ ለፋና ብሮድካስቲንግ ኮርፖሬት በላከው መግለጫ፥ በየካቲት ወር ከአውሮፕላን ነዳጅ በስተቀር የሌሎቹ ነዳጅ ምርቶች መሸጫ ዋጋ በነበረበት ይቀጥላል ብሏል።

የአውሮፕላን ነዳጅ ዋጋ በአዲስ አበባ በጥር ወር ሲሸጥበት ከነበረው 21 ብር 46 ሳንቲም፥ በየካቲት ወር 1 ብር ከ62 ሳንቲም ጭማሪ በማድረግ 23 ብር ከ08 ሳንቲም እንደሚሸጥም ሚኒስቴሩ ገልጿል።

በዓለም አቀፍ ገበያ የሚኖረውን የነዳጅ ዋጋ መነሻ በማድረግም እንደ አስፈላጊነቱ የዋጋ ማስተካከያ ሊደረግ እንደሚችል ሚኒስቴሩ በመግለጫው ጠቁሟል።