የብር የውጭ ምንዛሬ ተመን ማስተካከያን ተከትሎ በሸቀጦች ላይ የዋጋ መናር እንዳይከሰት ይሰራል - የንግድ ሚኒስቴር

አዲስ አበባ ፣ ጥቅምት 1 ፣ 2010 (ኤፍ ቢ ሲ) የብር የውጭ ምንዛሬ ተመን ላይ የተደረገውን ማስተካከያ ተከትሎ በተለይ በመሰረታዊ ሸቀጦች ላይ የዋጋ መናር እንዳይከሰት እንደሚሰራ የንግድ ሚኒስቴር አስታወቀ።

የኢትየጵያ ብሄራዊ ባንክ ተቀዛቅዞ የቆየውን የኢትዮጵያ የወጪ ንግድ ገቢን ለማስተካከል የብር የውጭ ምንዛሬ ተመን በ15 በመቶ እንዲዳከም ወስኖ፤ ብር ከሌሎች ሀገራት መገበያያዎች አንጻር ያለው ምንዛሬም በዚህ መልኩ ተሰልቶ ስራ ላይ እንዲውል አድርጓል።

ከዚህ ባለፈም ዝቅተኛው የባንክ ተቀማጭ ሂሳብ ወለድ ከ5 ወደ 7 በመቶ ከፍ እንዲል ተደርጓል፤ ከውጭ ምንዛሬ ተመኑ ጋር በተያያዘ ግን የዋጋ ግሽበት ሊከሰት ይችላል የሚሉ ስጋቶች ይደመጣሉ።

በአዲስ አበባ ዩኒቨርሲቲ የኢኮኖሚክስ ፕሮፈሰር ጣሰው ወልደሀና የብር የውጭ ምንዛሪ ተመን መዳከም፥ የዋጋ መወደድን ሊያስከትል እንደሚችል ይናገራሉ።

ሌላው የምጣኔ ሀብት ባለሙያ ዶክተር ቆስጠንጢኖስም ይህ የምንዛሪ ተመን ማሻሻያ፥ በተለይም ለወር ደመወዝተኛው መጠነኛ የሸቀጦች ውድነትን የማስከተል ባህሪ ይኖረዋል ይላሉ።

የኢፌዴሪ የንግድ ሚኒስቴር ይህን አጋጣሚ በመጠቀም የንግዱ ማህበረሰብ አላስፈላጊ ጭማሪዎችን እንዳያደርግ ቅድመ ዝግጅት ማድረጉን ገልጿል።

በሚኒስቴሩ የህዝብ ግንኙነት ሃላፊ አቶ ወንድሙ ፍላቴ፥ መሰረታዊ የፍጆታ እቃዎች ማለትም ዘይት፣ ስኳር እና የዳቦ ስንዴ መንግስት በቂ ድጎማ አድርጎ ወደ ሀገር ውስጥ የሚያስገባቸው በመሆኑ እነዚህ የፍጆታ እቃዎች ላይ ጭማሪ ማድረግ አይቻልም ብለዋል።

የህዝብ ግንኙነት ሃላፊው ከመሰረታዊ የፍጆታ እቃዎች ባሻገር የምንዛሪ ተመኑ ተግባራዊ ከተደረገበት ቀን በፊት በገቡ እቃዎች ላይም ማስተካከያውን ተገን አድርጎ ጭማሪ ማድረግ አይቻልም ነው ያሉት።

እስካሁን በአከፋፋዮችም ሆነ በማጠራቀሚ ዲፖዎች የሚገኘው ነዳጅም ባለፈው የውጭ ምንዛሪ ተመን የገባ በመሆኑ፥ የዋጋ ጭማሪ አይደረግበትም።

ከዛሬ ጀምሮ ከውጭ የሚገቡ እቃዎች ግን በአዲሱ የውጭ ምንዛሬ ተመን የሚገቡ በመሆናቸው፥ እንደ መሸጫ ዋጋቸው ታይቶ መጠነኛ ማስተካከያ ሊደረግባቸው እንደሚችል ተናግረዋል።

አላስፈላጊ የዋጋ ጭማሪዎች እንዳይኖሩ በኢትዮጵያ ንግድ ስራዎች ኮርፖሬሽን ስር ያሉ አለ በጅምላ እና የመንግስት ልማት ድርጅቶችን ማስፋት እና ማጠናከርም በሚኒስቴሩ የተያዙ እቅዶች ናቸው።

አስመጭውም ሆነ አከፋፋዩ ለሀገር እና ለህብረተሰቡ በማሰብ ፍትሃዊ የሆነ ንግድ ማካሄድ ይገባዋል ነው ያሉት አቶ ወንድሙ።

ከዚህ ዉጭ ግን አላስፈላጊ ጭማሪ የሚያደርጉ አካላት ካሉ መንግስት አስፈላጊውን እርምጃ እንደሚወስድ ገልጸዋል።

ለዚህም እንዲያመች በየገበያ ማዕከላት፣ ሱፐር ማርኬት፣ በዋና ማከፋፋያ እና ችርቻሮ ቦታዎች ላይ ድንገተኛ የቁጥጥር ስራዎች ይካሄዳሉ።

በቁጥጥሩ አላግባብ ትርፍ ለማግኘት በሚል ከፍተኛ ጭማሪ ሲያደርጉ የተገኙ ነጋዴዎች ካሉ ግን ይህን ማስተካከል የሚችል፥ እርምጃ ሚኒስቴሩ ለመውሰድ እንደሚገደድም አስረድተዋል።

መንግስት ከሚያደርገው ቁጥጥር ውጭ ሸማቹ ህብረተሰብ የንግድ ስርዓቱን የሚያዛባ ማንኛውንም ድርጊት ከተመለከተ ተገቢውን ጥቆማ በመስጠት እንዲተባበርም ሚኒስቴሩ ጥሪውን አቅርቧል።

 

 

 

 

 

በተመስገን እንዳለ