የምግብ መፈጨት ችግርን ለመቅረፍ ፍቱን የሆነው ማንጎ

አዲስ አበባ፣ ሰኔ 4፣ 2010 (ኤፍ.ቢ.ሲ) የፍራፍሬዎች ንጉስ በሚል ስሙ የሚታወቀው ማንጎ በርካታ የጤና ጠቀሜታዎች እንዳሉት በተለያዩ ጊዜያት የወጡ ጥናቶች ያመለክታሉ።

ከሰሞኑ የወጣ አዲስ ጥናት ደግሞ ማንጎ ከሌሎች በፋይበር ንጥረ ነገሮች በተሻለ የምግብ መፈጨት ችግርን ለመቅረፍ እንደሚረዳ አመልክቷል።

በዓለማችን ላይ በአዋቂ የእድሜ ክልል ውስጥ ከሚገኙ 5 ሰዎች ውስጥ አንድ ሰው ለሆድ ድርቀት የተጋለጠ መሆኑም መረጃዎች ያመለክታሉ።

ታዲያ ተመራማሪዎች ለዚህ መፍትሄ ይሆናል የሚለውን ለማፈላለግ ባካሄዱት ጥናት ነው ከፍራፍሬዎች ሁሉ ማንጎ ተሽሎ የተገኘው ተብሏል።

ለ4 ሳምንንታት በተካሄደው ጥናት ላይ በከፍተኛ ደረጃ በሆድ ድርቀት ችግር የሚሰቃዩ 36 ወንድ እና ሴቶች በሁለት ቡድን ተከፍለው ተሳትፈውበታል።

በዚህም አንደኛው ቡድን ውስጥ ያሉ ሰዎች በቀን 300 ግራም ማንጎ እንዲመገቡ የተደረገ ሲሆን፥ ሌላኛው ቡድን ደግሞ በየእለቱ የፋይበር ይዘት ያለው መድሃኒት እንዲወስዱ በማድረግ ነው ክትትል የተደረገው።

በወሩ መጨረሻ የተገኘው ውጤትም ሁለቱም ቡድኖች የሆድ ድርቀታቸው መጠን ቀንሱ የተገኘ ሲሆን፥ ማንጎን አዘውትረው ሲመገቡ የነበሩት ግን የበለጠ ጤነኛ ሆነው ተገኝተዋል ነው የተባለው።

በውስጡ በርካታ የፋይበር እና የኒውትረንት ንጥረ ነገሮችን የያዘው ማንጎ ከምግብ መፈጨት በተጨማሪ የጨጓራ ህመመን ለማከም እንደሚረዳም ጥናቱ ለይቷል።

በአሜሪካ ቴክሳስ ኤ ኤንድ ኤም ዩኒቨርሲቲ የጥናት ቡድኑ መሪ የሆኑት ፕሮፌሰር ሱዛን መርቴንስ ታልኮት፥ በጥናቱ ማንጎ የምግብ መፈጨት ችግርን በመቅረፍ ለሆድ ድርቀወት መፍትሄ መሆኑን ለይተናል ብለዋል።

ምንጭ፦ www.dailymail.co.uk