ህፃናት በቀን 1 ኪሎ ሜትር በእግር እንዲጓዙ ወይም እንዲሮጡ ማድረግ የሚያስገኝላቸው የጤና ጠቀሜታ…

አዲስ አበባ፣ ግንቦት 6፣ 2010 (ኤፍ.ቢ.ሲ) ህፃናትን በየእለቱ ለ1 ኪሎ ሜትር ገደማ በእግር እንዲጓዙ አሊያም እንዲሮጡ ማድረግ ለጤናቸው ጠቀሚ መሆኑን ከሰሞኑ ይፋ የተደረገ ጥናት አመልክቷል።

እንደ ጥናቱ ገለፃ በቀን 1 ኪሎ ሜትር እና ከዚያ በላይ የእግር ጉዞ የሚደርጉ ህጻናት አብዛኛውን ጊዜ ተቀምጠው ከሚያሳልፉት ጋር ሲነፃፀሩ የበለጠ ጤነኛ ሆነው ተገኝተዋል።

እንደ አውሮፓውያኑ አቆጣጠር ከ2012 ጀምሮ የተካሄደው ጥናቱ በዓለም ዙሪያ በሚገኙ 3 ሺህ 600 ትምህርት ቤቶች ውስጥ የሚገኙ ህፃናት ተማሪዎችን ያካተተ ነው።

በጥናቱ ላይ የተካፈሉት እድሜያቸው ከ4 እስከ 12 ዓመት የሆኑት ህጻናቱ በየቀኑ ለ15 ደቂቃ ያክል በትምህርት ቤታቸው ውስጥ የእግር ጉዞ እንዲያደርጉ አሊያም እንዲሮጡ በማድረግ ክትትል ተደርጎባቸዋል።

በብሪታንያ ስተርሊንግ ዩኒቨርሲቲ የጥናት ቡድኑ መሪ ዶክተር ናኦሚ ብሩክስ እንደተናገሩት፥ በጥናቱ ወቅት በየእለቱ እንቅስቃሴ የሚያደርጉ ተማሪዎች ከሌሎች ጋር ሲነፃፀሩ የበለጠ ጤናማ ሆነው ተገኝተዋል።

ህፃናት ተመሪዎቹ የበለጠ በተንቀሳቀሱ ቁጥርም የጤናቸው ሁኔታም በዚያው ልክ የተሻለ እየሆነ እንደመጣም ነው ዶከር ናኦሚ የተናገሩት።

ህፃናት ተማሪዎቹ የአካል ብቃት እንቅስቃሴ ማድረጋቸው ከአጠቃላይ ጤንነታቸው በተጨማሪም በቀላሉ ለድብርት እንዳይጋለጡ እንደሚያደርግም ጥናቱ አመላክቷል።

ተመራማሪዎቹ እንደሚያምኑት ከሆነ በቂ የአካል ብቃት እንቅሰቃሴን የማይሰሩ ህፃናት ልጆች በቀላሉ ለእንደ ድብርት ላሉ የአእምሮ ጤና መዛባት ሊዳረጉ ይችላሉ።

ስለዚህ ህፃናት ልጆች በቀን ውስጥ ቢያንስ 1 ኪሎ ሜትር በእግር እንዲጓዙ ማድረግ ወይም እንዲሮጠረ ማድረግ የአእምሯቸው እና የአጠቃላይ ጤናቸውን ለመጠበቅ ስለሚጠቅም ከወዲሁ ሊታሰብበት ይገባል ብለዋል።

በትምህርት ቤቶች ውስጥም ህጻናት እየተሯሯጡ የሚጫወቱበት በቂ ስፍራ መዘጋጀት አለበት ያሉት ተመራማሪዎቹ፥ የሀገራት መንግስታትም ይህንን ከግምት ወስጥ ማስገባት አለባቸው ሲሉም መክረዋል።

ምንጭ፦ www.dailymail.co.uk