ለውፍረት የሚያጋልጡ የጧት ልማዶች

አዲስ አባባ፣ ግንቦት 2፣ 2010 (ኤፍ.ቢ.ሲ) በተለያዩ የዓለም ሀገራት ውፍረት አንገብጋቢ በሆነ ሁኔታ ብዙዎችን እያሳሰበ ይገኛል፡፡

በዩናይትድ ስቴትስ ለአራት ዓመታት በተሰራ ጥናት 36 በመቶ የሚሆኑት አዋቂዎች ለውፍረት መጋለጣቸውን በጥናቱ ተመልክቷል፡፡

ውፍረት ለከፍተኛ የደም ግፊት፣ ከኮሌስትሮል ጋር ተያይዘው ለሚከሰቱ በሽታዎች እንዲሁም ለስኳርና ለሌሎችም ህመሞች ይዳርጋል፡፡

ለውፍረት ከሚያጋልጡን በርካታ ምክንያቶች እንዳሉ ሆነው የጧት ድርጊቶቻችን ዋነኞቹ ናቸው ተብሏል፡፡

ከልክ ያለፈ እንቅልፍ

ከልክ ያለፈ እንቅልፍ ለውፍረት ከሚዳርጉን ዋነኛ ጉዳዮች መካካል አንደኛው ሲሆን፥ በቀን ለአስር ሰዓታት የሚተኙ ሰዎች ከሰባት እስከ ዘጠኝ ሰዓት ከሚተኙት ሰዎች ይልቅ ለውፍረት የተጋለጡ መሆናቸውን በጥናቱ ተጠቅሷል፡፡

በተጨማሪም ጥቂት መተኛትም በራሱ ውፍረትን ለመቀነስ አይረዳም ያሉ ሲሆን፥ አዋቂዎች ከሰባት እስከ ዘጠኝ ሰዓት ባለው ቢተኙ ይመከራል፡፡

ቁርስን ያለመመገብ

ቁርስን ያለመመገብ የምግብ መፈጨት ሂደት ላይ ቀውስን ያስከትላል እንዲሁም ሰውነታችን ስብን እንዳያቃጥል እክል ይፈጥራል፡፡

በአንጻሩ ቁርሳችንን በምንመገብበት ወቅት የሰውነታችን አቅም ይጨምራል በተለይም የሰውነት የግሉኮስ መጠንን የተረጋጋ እንዲሆን ያስችለዋል፡፡

ተመራማሪዎቹ ከነቁ በኃላም ለረዥም ጊዜ ቆይቶ መብላትም ጉዳት ያመጣል ይላሉ ስለዚህም ከነቃን በጥቂት ሰዓታት ውስጥ እንድንመገብ ይመክራሉ፡፡

የተቀነባበሩ ምግቦችን መመገብ

በፋብሪካ የተቀነባበሩ ምግቦችን መመገብ ከልክ ላላፈ ውፍረት እንደሚያጋልጡን በ2016 በአሜሪካ የተጠና ጥናት አትቷል፡፡

አጥኚዎቹም ከፓንኬክ፣ ከዶናት፣ ስኳር ከበዛባቸው ምግቦች እንዲሁም ከታሸጉ ጁሶች መራቅ እንደሚገባ ገልጸዋል፡፡ 

የጧት ፀሐይ ያለመሞቅ

የጧት ፀሐይ የሰውነታችንን የምግብ መፈጨት ሂደትን የሚያቀላጥፍ ሲሆን፥ ከቫይታሚን ዲ የምናገኘው ንጥረ ነገር ውፍረትን ይከላከላል፡፡

ከ20 እስከ 30 ደቂቃ ድረስ የጧት ፀሐይን መሞቅ ሰውነታችን ንቁ እንዲሆን ያደርገዋል፤ ይህም ለጤና ከፍተኛ ጠቀሜታ እንደሚሰጥ ገልጸዋል፡፡

በቂ ውሃ ያለመጠጣት

በቂ ውሃ መጠጣት ሰውነታችንን ትክክለኛ ሙቀት እንዲኖረው ያስችለዋል፣ ለምግብ መፈጨት አስተዋፅዖ ያደርጋል እንዲሁም ውፍረትን ለመቀነስ ይረዳል፡፡

በጧት ቡና እና ሻይ ከመጠጣታችን አስቀድመን ውሃ መውሰድ እንደሚገባንም አጥኚዎቹ ይመክራሉ፡፡

እንቅስቃሴ ያለማድረግ

በጧት የሰውነት እንቅስቃሴ የሚያደርጉ ሰዎች 20 በመቶ የሚሆነውን የስብ ክምችት ማቃጠል እንደሚችሉ ጥናት አሳይቷል፡፡

እነዚህ ከላይ የተጠቀሱት ስድስት የሚደርሱ የጧት ልምዶቻችንን መቅረፍ ከቻልን ውፍረትን መከላከል እንደምንችል አጥኚዎቹ በጥናታቸው ገልጸዋል፡፡


ምንጭ፦ሆምሪሜዲይስ
በአብርሃም ፈቀደ ወደ አማርኛ ተመለሰ