ፌስቡክን ዜና ለማየት የሚጠቀሙት ቁጥራቸው አነስተኛ ነው ተባለ

አዲስአበባ፣ ሰኔ 7፣ 2010 (ኤፍ.ቢ.ሲ) ፌስቡክን ለዜና እና መሰል ጉዳዮች የሚጠቀሙት ግለሰቦች ጥቂት ናቸው የተባለ ሲሆን፥ በአንጻሩ እንደ ዋትሳፕ ያሉ የመልዕክት መለዋወጫ አፕሊኬሽኖች የተሻሉ መሆናቸው ጥናቶች አስታወቁ፡፡

 

ይህ የተባለው በሰባተኛው ዓመታዊ የዲጂታል ዜና ሪፖርት ላይ ቀርቦ ነው፡፡

ተጠቃሚዎች ፌስቡክ ላይ ዜናዎችን መመልከት ያቆሙት ከግላዊ መረጃ ብርበራ ጋር በተያያዘ እና አሉታዊ ይዘት ያላቸው ክርክሮች በባህሪያቸው መያዛቸውን ተከትሎ መሆኑን ገልጸዋል፡፡

ጥናቱ በዓለም አቀፍ ደረጃ ግለሰቦች በምን መልኩ ዜናዎችን ይመለከታሉ በሚለው ጉዳይ ላይ አትኩሮቱን አድርጎ ሰርቷል፡፡

ኦክስፎርድ ዩኒቨርስቲ የሚገኘው የሮይተርስ የጋዜጠኞች ጥናት ተቋም በዓለም አቀፍ ደረጃ ምርምሩን ለማካሄድ በ37 ሀገሮች 74 ሺህ ግለሰቦችን መጠየቁን አስታውቋል፡፡

በጥናቱም በታዳጊ ክልል ላይ የሚገኙት አብዛኛዎቹ የማህበራዊ ሚዲያ ተጠቃሚዎች ለዜና ዋትሳፕ፣ ስናፕቻት እና ኢንስታግራምን ይጠቀማሉ ተብሏል፡፡

በዚህም በአራት ዓመታት ውስጥ የዋትሳፕ ተጠቃሚዎች ቁጥር ወደ 15 በመቶ ያድጋል የተባለ ሲሆን፥ ደህንነታቸው በሚያሳስባቸው ሀገራት ላይ የሚገኙ ግለሰቦች ቁጥሩ ከተገለጸው በላይም እንደሚጨምር ይጠበቃል፡፡

በዩናይትድ ስቴትስ ፌስቡክን በ2017 ለዜና ከሚጠቀሙት ጋር ቁጥራቸው ሲነጻጸር ዘጠኝ በመቶ ማሽቆልቆሉም ተግለጿል፡፡

በጥቅሉ 54 በመቶ የሚሆኑት የዓለማችን ሰዎች ሐሰተኛ ዜናዎች እንደሚያሳስቧቸው መግለጻቸውን ጥናቱ አስታውቋል፡፡

60 በመቶ አውሮፓውያን እና 63 በመቶ እሲያውያን ሐሰተኛ ዜናዎችን ለማቆም መንግስት ጣልቃ መግባት ይኖርበታል ብለዋል፡፡

በዓለም አቀፍ ደረጃ በተካሄደው ጥናት አሁንም ቢሆን ሰዎች ቴሌቪዥንን ታማኝ የዜና ምንጫቸው አድርገው መቀጠላቸውን አትቷል፡፡

 

 

ምንጭ፦ቢቢሲ