ማይክሮሶፍት የመረጃ ማእከሉን ውቅያኖስ ውስጥ አስቀመጠ

አዲስ አበባ፣ ሰኔ 4፣ 2010 (ኤፍ.ቢ.ሲ) የመረጃ (ዳታ) ማእከላት ለዓለማችን የእለት ተእለት እንቅስቃሴ ወሳኝ እየሆኑ ከመጡ ዋል አደር ብለዋል።

የዳታ ማእከላት ከሌሉ የድረ ገፅ አገልግሎቶች፣ መረጃዎቻችንን ለመጠባበቂያነት የምናከማችባቸው እንደ ክላውድ ያሉ የመረጃ ማስቀመጫ ቋቶች አይኖሩም ነበር።

ታዲያ እነዚህ የመረጃ ማከማቻ ማእከላት ስራቸውን ለመስራት እና ራሳቸውን ለማቀዝቀዝ ከፍተኛ የሆነ የኤሌክትሪክ ሀይል እንደሚጠቀሙም ይታወቃል።
ይህ ደግሞ ለአካባቢ ብክለት መንስኤ መሆኑ ነው የሚነገረው።

ግዙፉ የቴክኖሎጂ ኩባንያ ማይክሮሶፍት ይህ የአካባቢ ብክለትን ያስከትላል የተባለውን ችግር ለመቅረፍ “ናቲክ” በተባለው ፕሮጄክቱ አዲስ ነገር ይዞ መምጣቱ ነው የተነገረው።

በዚህ ፕሮጄክትም የማይክሮሶፍት የመረጃ ማእከላት የሚያስፈልጋቸውን የኤሌክትሪክ ሀይል ከፀሀይ ብርሃን እና ከንፋስ የመሳሰሉ ታዳሽ ምንጮች እንዲያገኙ ተደርጓል።

ማይክሮሶፍት የመረጃ ማእከላቱን ሙቀት ለማቀዝቀዝ ደግሞ ሌላ ተጨማሪ ሀይል ሳያስፈልግ ማእከላቱ ውቅያኖስ ውስጥ እንዲቀመጡ ማድረጉም ተነግሯል።

under_ocean_1.png

የመረጃ ማእከላቱ ውቅያኖስ ውስጥ መቀመጥ ከማቀዝቀዝ በዘለለም ሌላ ጠቀሜታ እንዳለውም ተነግሯል።

ይህም የመረጃ ማከማቻ ማእከላቱን በከተማዎች አቅራቢያ በማስቀመጥ ነዋሪዎች ድረ ገጽ፣ የቪዲዮ ጨዋታዎች እና አርቴፊሻል ኢንተለጀንሲ ላይ የተመረኮዙ ቴክኖሎጂዎችን በቀላሉ እና በፍጥነት እንዲያገኙ ያስችላቸዋል።

ምንጭ፦ www.huffingtonpost.co.uk